हिमालयन बैंकको बन्ड २०८६ को बिक्री प्रबन्धकमा नबिल इन्भेष्टमेन्ट

१२ जेठ, काठमाडौं । हिमालयन बैंक र नबिल इन्भेष्टमेन्ट बैंकिङबीच सम्झौता भएको छ । हिमालयन बैंक लिमिटेडको एक हजार रुपैंयाँ अंकित दरको २५ लाख कित्ताले हुन आउने दुई अर्ब ५० करोड रुपैंयाँ बराबरको १० दशमलव ५० प्रतिशत हिमालयन बैंक लिमिटेड बन्ड २०८६ जारी गर्न नबिल इन्भेष्टमेन्ट बैंकिंङ लिमिटेडलाई बिक्री प्रबन्धकको रुपमा नियुक्त गरेको छ ।

उक्त ऋणपत्रको अवधि सात वर्ष रहेको र ब्याजदर १० दशमलव ५० प्रतिशत रहेको छ । उक्त सम्झौतापत्रमा हिमालयन बैंक लिमिटेडको तर्फबाट प्रमुख कार्यकारी अधिकृत अशोक सम्शेर जबरा र नबिल इन्भेष्टमेन्ट बैंकिंग लिमिटेडको तर्फबाट प्रमुख कार्यकारी अधिकृत मनिष नारायण जोशीले हस्ताक्षर गरेका छन् ।

प्रस्तावित ऋणपत्र नियमनकारी निकायहरुको स्विकृति पश्चात निश्काशन गरिने बैंकले जानकारी दिएको छ । काठमाडौंको कमलादी स्थित मुख्य कार्यालय रहेका हिमालयन बैंकले देशका सात वटै प्रदेशमा ७४ वटा शाखाहरु मार्फत कारोबार गर्दै आएको छ ।

बैंक्ले उच्चस्तरीय, आधुनिक एवं नविनतम प्रविधिहरु सहितको सुरक्षित बैंकिङ सेवा प्रदान गर्दै आइरहेको छ । ग्राहकहरुलाई अधिकतम प्रतिफल दिने उद्देश्यले बैंकले मुद्दती खातामा मासिकरुपमा ब्याज प्रदान गर्ने बिशेष योजना समेत कार्यान्वयनमा ल्याएको छ ।