बेलायतबासी नेपालीहरुद्धारा पुनको आविष्कार केन्द्रलाई ५ लाख सहयोग

१६ जेठ, काठमाडौं ।  डा. महावीर पुनसँग बेलायतको डोर्सेट निवासी नेपालीहरुको समाज बीसीपी (बोर्नमाउथ, क्राइसचर्च र पुल) नेपालीज कम्युनिटीले अन्तक्रिया कार्यक्रम सम्पन्न गरेको छ । च्यारिटी लन्च गरिएको उक्त कार्यक्रममा २५ जना भन्दा धेरै नेपालीहरुको सहभागिता रहेको थियो।

महावीर पुनद्वारा सुरु गरिएको नेपाल इनोभेसन सेन्टरलाई केही आर्थिक सहयोग गर्ने हेतुले गरिएको उक्त च्यारिटी लन्चमा ३३०० पाउन्ड भन्दा धेरै रकम जम्मा गर्न सफल भएको र उक्त सबै रकम नेपाल इनोभेसन सेन्टरलाई हस्तान्तरण गरिने जानाकारी दिइएको थियो। बीसीपी नेपालीज कम्युनिटीका अगुवा तुलसी फुयालले स्वागत मन्तव्य दिदै डा. महावीर पुनको कार्यको प्रशंसा गरेका थिए।

इनोभेसन सेन्टर खोल्नुको कारण र उद्देश्यको बारेमा डा. पुनले जानकारी दिदै अहिले भैरहेका कामहरुको र आफ्नो बेलायत तथा युरोप भ्रमणको उद्देश्यका बारेका बताएका थिए ।

कार्यक्रममा इन्जिनियर रामराज शर्मा , समाजसेवी सागर भट्टराई, नबिन महत, रञ्जन काफ्ले, लक्ष्मण अर्याल, हिरा रिमाल लगायतको सहभागिता थियो। कार्यक्रमको संयोजन हिरा रिमालले गरेका थिए भने २९-२९ नामको नेपाली रेस्ट्रुरेन्ट र उत्सव विष्टले लन्चको प्रायोजन गरेका थिए।

डा. पुनले आफ्नो आगामी आयोजनाहरुको बारेमा समाजलाई बताएका थिए भने विदेश रहेका नेपालीहरुको सीप र ज्ञानलाई इनोभेसन सेन्टरमा कसरी प्रयोग गर्न सकिन्छ, इनोभेसन सेन्टरले आफ्नो नियमित आम्दानीको लागी के गर्दा उत्तम हुन्छ जस्ता बिषयमा इन्जिनियरद्वय रामराज शर्मा र तुल्सी फुयालले डा. पुनलाई सल्लाह दिएका थिए।

११ बजेदेखि २ बजेसम्म चलेको उक्त स्वागत तथा सहयोग कार्यक्रममा इनोभेसन सेन्टरलाई भविष्यमा पनि आफ्नो सहयोग जारी रहने भन्दै डा. पुनले देश निर्माणमा गरेको योगदानको सम्मान गरिएको थियो।