चितवनमा भारतीय कारको ठक्करबाट एकको मृत्यु

१९ जेठ चितवन । पूर्वी चितवनको खैरहनीमा भारतीय नम्बर प्लेटको कारले मोटरसाइकललाई ठक्कर दिँदा एक जनाको मृत्यु भएको छ ।

मृत्यु हुनेमा मोटरसाइकल चितवन कालिका नगरपालिका ४ घर भइ हाल खैरहनी-८ मा बस्दै आएका २१ वर्षीय विश्वास गुरूङ रहेका छन् । पूर्व-पश्चिम महेन्द्र राजमार्गको खैरहनी नगरपालिका-९ सिमलटाँडीमा उनी दुर्घटनामा परेको चितवन प्रहरीले जनाएको छ। बुधबार साँझ सवा आठ बजे पूर्वबाट पश्चिम नारायणगढतर्फ आउँदै गरेको जेएच ०१ डीएक्स ७७४९ नम्बरको भारतीय कारले विपरीत दिशाबाट आउँदै गरेको प्रदेश ०३-००५ प २६६० नम्बरको मोटरसाइकललाई ठक्कर दिएको थियो ।

कारको ठक्करबाट गम्भीर घाइते गुरुङको भरतपुरस्थित शिक्षण अस्पतालमा उपचारका क्रममा बुधबार राति सवा नौ बजे ज्यान गएको प्रहरीले जनाएको छ । घटनापछि राजमार्गमा भेला भएका स्थानीयले केहीबेर बाटो रोक्नुका साथै कार तोडफोड गरेका थिए । कारका चालक भारत बिहार राज्य पश्चिम चम्पारण जगदिशपुर-४ बस्ने ३५ वर्षीया आलोककुमारलाई इलाका प्रहरी खैरहनीले नियन्त्रणमा लिएको छ ।