मौद्रिक नीति कसिलो आउन सक्छ, मर्जरमा जानेले चाँडो गर्नूः राष्ट्र बैंक

२० जेठ, काठमाडौं ।  नेपाल राष्ट्र बैंकले आगामी मौद्रिक नीति र बाणिज्य बैंकहरुको अवस्था विषयमा बैंक प्रतिनिधिहरुसँग छलफल गरी मर्जरमा जाने प्रक्रियामा रहेकाहरुलाई चाँडा प्रक्रिया सक्न निर्देशन दिएको छ ।

बिहीबार गभर्नर महाप्रसाद अधिकारीले बैंकका प्रतिनिधिहरुलाई बोलाएर राखेको छलफलमा मर्जरमा जाने बैंकलाई चाँडै प्रक्रिया सुरु गर्न निर्देशन दिएका हुन् ।

राष्ट्र बैंकको छलफलमा वाणिज्य बैंकका सञ्चालक समितिका अध्यक्ष र अडिट कमिटीको संयोजक लगायत सहभागी रहेको बताइएको छ ।छलफलमा राष्ट्र बैंकका प्रवक्ता डा. गुणाकर भट्टले अहिलेको वित्तीय सूचक तथा समस्या र चुनौतीबारे जानकारी गराएका थिए ।

बैंकका सञ्चालकहरूले व्यवस्थापनमा राष्ट्र बैंकको अनावश्यक दवाव आउँदा वित्तीय क्षेत्रमा अस्वस्थ प्रतिस्पर्धा धाराणा राखेपछि बैंकहरु सुशासनमा बसे राष्ट्र बैंकले हस्तक्षेप नगर्ने भट्टले बताएका थिए ।

राष्ट्र बैंकका प्रतिनिधिले आउँदो मौद्रिक नीति वित्तीय क्षेत्रमा देखिएको जोखिमलाई कम गर्न थप कसिलो बनाउने संकेत बैंकका सञ्चालकहरुलाइ दिएका थिए । गभर्नर अधिकारीले बैंकहरूलाई मर्जरमा जाने भए प्रारम्भिक सम्झौताका लागि असार मसान्तसम्मको समय रहने बताएको राष्ट्र बैंक स्रोतले बताएको छ ।