संसदमा एमालेका सांसदः उपस्थिति पोजेटिभ, विषयवस्तुमा नेगेटिभ

२४ जेठ, काठमाडौं । अघिल्लो पटक माधवकुमार नेपाल र सभामुख अग्निप्रसाद सापकोटाको विषयलाई लिएर पुरै संसद अवरोध गरेको प्रमुख प्रतिपक्षी दल नेकपा एमालेले चालु संसद अधिवेशनको भने पूर्ण उपयोग गरेको छ ।  बैठकमा उपस्थितिदेखि सरकारले ल्याएका सबै विषयमा एमाले सांसदहरु प्रतिकारात्मक रुपमा प्रस्तुत भएका छन् ।

सरकारले आगामी आर्थिक वर्षका लागि संसद सुरु भएकै दिन पेश गरेको बजेटका सिद्धान्त र प्राथमिकतामा अहिलेसम्म एमाले सांसदहरुले पूर्णरुपले विरोध गर्दै आएका छन् । एमालेको भाषामा सरकारले ल्याएको नीति तथा कार्यक्रम पूर्ण असफल र कामै नलाग्ने छ ।

बजेटमा आएका विषयबस्तुमा पनि एमालेले पुरै नकारात्मक टिप्पणी गरेको छ । बजेट एमालेका लागि महासत्रु भएको ठम्याई एकखाले सांसदहरुको छ । पार्टी अध्यक्ष केपी शर्मा ओलीले संसदीय दलको बैठकनै राखेर बजेटको चर्को विरोध, आलोचना र भण्डाफोर नै गर्न निर्देशन दिएपछि प्रतिनिधिसभाको बैठकमा एमाले सांसदको उपस्थिति पनि बाक्लिएको थियो ।

बजेटको मन्त्रालय अन्तर्गतको छलफल अझै जारी छ । बजेट बाहेक संसदमा पेस भएको बलात्कार सम्बन्धि हदम्यादको विषयमा पनि एमाले सांसदहरु प्रतिकात्मक शैलीमै उत्रिए । सत्ता पक्ष खास गरी नेपाली कांग्रेसका महिला सांसदहरु बलात्कार सम्बन्धि मुद्दाको हदम्याद हटाउनुपर्ने पक्षमा थिए । तर, एमाले सांसद बिन्दा पाण्डेबाहेक अरु महिला सांसदहरु हदम्यादको पक्षमा देखिएनन् ।

मंगलबारको बैठकमा एमाले सांसदहरुले गृहमन्त्री बालकृष्ण खाँणलाई तार्गेट बनाए । एमाले सांसदहरूले प्रतिनिधिसभा बैठकमा सरकारको कडा आलोचना गरे । बर्दियाको मधुवन नगरपालिकामा सोमबार प्रहरीको गोली लागेर मारिएकी नवीना थारुको विषयमा सांसदहरूले सरकारको कडा आलोचना गर्दै प्रहरीलाई गोली हान्ने आदेश कसले दियो भन्दै गृहमन्त्रीको जवाफ माग गरे ।

सांसदहरू खगराज अधिकारी, भीम रावल, विमला विक, सूर्य पाठक, लालबहादुर थापा, यज्ञबहादुर बोगटीले बर्दियाको गोलीकाण्डबारे सरकारको विरोध गरेका थिए । एमाले सांसद घनश्याम खतिवडाले गृहमन्त्री बालकृष्ण खाँणको जवाफप्रति आपत्ति जनाउँदै बर्दियामा भएको गोलीकाण्डबारे छानबिन गर्न संसदीय समिति गठन गर्न माग गरे ।

एमाले सांसद लालबहादुर थापाले बाजुराको बूढीगंगा नगरपालिकामा स्थानीय तह निर्वाचनमा भएका निर्णय र धाँधलीको जिम्मेवारी लिँदै गृहमन्त्री बालकृष्ण खाँण, प्रमुख निर्वाचन आयुक्त दिनेशकुमार थपलियाको राजीनामानै मागे । उनले आयुक्तहरू ईश्वरी पौडेल र रामप्रसाद भण्डारीको पनि राजीनामा माग गरे ।

सांसद थापाले सत्तापक्षले चुनावमा धाँधली गरेको र त्यसमा निर्वाचन आयोगको नेतृत्वले साथ दिएको आरोप लगाए । बूढीगंगामा एमाले र कांग्रेसका तर्फबाट केही वडाहरूमा बुथ कब्जा गरी ९९ प्रतिशतसम्म मतदान गरिएपछि आयोगले पुनः निर्वाचनको निर्णय गरेको विषयलाई लिएर उनले राजीनामा मागेका हुन् ।

एमाले सांसदहरुले प्रश्न उठाएपछि गृहमन्त्री बालकृष्ण खाँणले बर्दिया घटनामा कसैको आदेश विना नै प्रहरीले गोली चलाएको बताए । खाँणले प्रहरीले गोली चलाएको भएपनि गृहमन्त्रालयबाट गोली चलाउने आदेश नभएको र प्रमुख जिल्ला अधिकारीले पनि आदेश नदिएको जानकारी गराए ।

उनले छानबिन प्रतिवेदनपछि सरकारले गल्ती भएको ठाउँमा सच्याउने, दोषीलाई कारबाहीको दायरामा ल्याउने र पीडित परिवारलाई परिपूरणको व्यवस्था गर्ने जानकारी गराए । एमाले सांसद थापाले राजीनामा मागेपछि गृहमन्त्रीले मतदान सरकारले रोकेको नभइ निर्वाचन आयोगले रोकेकाले राजीनामा दिनु नपर्ने बताए ।