गोदावरीधाममा कैवल्यनाथ मन्दिरमा प्राण प्रतिष्ठा

२६ जेठ, गोदावरी । कैलालीको गोदावरीधाममा नवनिर्मित कैवल्यनाथ मन्दिर (मोक्षद्वार) को आज शुभारम्भ गरिएको छ । मन्दिरमा स्थापना गरिएको पञ्चमुखी शिवलिंगको एक विशेष समारोहकाबीच १००८ स्वामी लोकानन्द माहाराजजीले प्राण प्रतिष्ठा गरे ।

सो मन्दिरको पुरानो कलात्मक शैलीमा निर्माण गरिएको छ । संघीय सरकारको सहरी विकास कार्यक्रमको सहयोगमा उपभोक्तामार्फत मन्दिर निर्माण गरिएको हो । झण्डै रु डेढ करोड बढीको लगानीमा मन्दिर निर्माण गरिएको गोदावरीधाम विकास समितिले जनाएको छ ।

मन्दिर परिसरमा १००८ शिवलिंगहरू स्थानीयवासीले आफ्ना दिवंगत पित्रृहरूको नाममा स्थापना गरेका छन् । मन्दिरमा पुगेर आज सुदूरपश्चिम प्रदेशका प्रमुख देवराज जोशीले पूजाआजा गर्नुभएको छ । पशुपतिनाथ मन्दिरको झल्को दिने गरी मन्दिरको निर्माण गरिएको गोदावरीधाम विकास समितिका अध्यक्ष पदमराज जोशीले बताए ।

मन्दिर निर्माण भएसँगै गोदावरीधाम क्षेत्रमा धार्मिक पर्यटन बढ्ने विश्वास उनले व्यक्त गरे । गोदावरीधाम विकास समितिले गोदावरीमा कुम्भमेला अर्धकुम्भ मेला आयोजना गर्दै आएको जनाइएको छ ।