जनरल इन्स्योरेन्सले चुक्तापुँजीको ३० प्रतिशत हकप्रद शेयर जारी गर्ने

१ असार, काठमाडौं । जनरल इन्स्योरेन्सको चौथो साधारण सभाले हकप्रद शेयर जारी गर्ने प्रस्ताव पारित गरेको छ । कम्पनीको चौथो साधारण सभा अमृतभोग, कालिकास्थान मा सम्पन्न भएको हो ।

सभामा संचालक समितिको तर्फबाट कम्पनीका अध्यक्ष कुनाल कयालद्वारा पेश भएको आर्थिक बर्ष २०७७/७८ को बार्षिक प्रतिवेदन उपर छलफल गरि पारित भएको छ ।

त्यस्तै लेखापरिक्षण प्रतिवेदन आर्थिक बर्ष सहितको असार मसान्तसम्मको वासलात, नाफा नोक्सान तथा नगद प्रवाह सम्बन्धी अनुसुचि माथि छलफल गरी पारित भएको छ ।

उक्त सभाले बीमा समितिको स्वीकृति लिई चुक्तापुँजीको ३० प्रतिशत अर्थात् १ः०.३ अनुपातमा हकप्रद शेयर जारी गर्ने प्रस्ताव पारित गरेको छ । यसबाहेक कम्पनीको अधिकृत पुँजी, चुक्तापुँजी र जारी पुँजी बृद्धि गर्ने सम्बन्धमा प्रस्ताव समेत सोही सभाबाट पारित भएको छ ।

त्यस्तै, आर्थिक वर्ष २०७८/७९ को लेखापरिक्षण समितिको सिफारिस लेखापरिक्षकको नियुक्ति गर्ने र निजको पारिश्रमिक लगायतका एजेण्डा पारित गर्दै सभा सम्पन्न भएको हो । साथै उक्त साधारण सभाको सुअवसरमा बीमा सेवा सबैको हातहातका भन्ने उद्देश्य सहित जिआइसि नेपाल नामक एप संचालनमा ल्याएको छ ।