रौतहटबाट नक्कली नोटसहित भारतीय नागरिक पक्राउ

२ असार, बीरगञ्ज । सशस्त्र प्रहरीले रौतहटको सीमावर्ती क्षेत्र बंकुल चोकबाट नेपाली र भारतीय नक्कली नोटसहित एक जना भारतीय नागरिकलाई पक्राउ गरेको छ ।

सशस्त्र प्रहरी बोर्डर आउटपोष्ट सरमुजवाको टोलीले बिहीबार बिहान भारत गोरखपुर घर भएका २३ वर्षीय सन्जय सक्सेनालाई नक्कली नोटसहित पक्राउ गरेको हो ।

पक्राउ परेका सक्सेनाको साथ बाट नेपाली एक हजार दरका ५० थान, भारतीय २ हजार दरका २३ थान र ५ सय दरका १० थान नक्कली नोट बरामद भएको सशस्त्र प्रहरी रौतहटले जनाएको छ ।

ससस्त्र प्रहरी नायव निरीक्षक जयराम यादवको नेतृत्वमा खटेको टोलीले बंकुल बजारमा रहेको बाल्मिकी चिया पसलमा चिया खाइरहेको बेला नक्कली नोटसहित सक्सेनालाई पक्राउ गर्न सफल भएको हो ।

सूचनाको आधारमा पुगेको ससस्त्र प्रहरीको टोलीले चिया खाएर बसिरहेका सक्सेनाको शरीर जाँच गर्दा उनको साथबाट नक्कली नोट बरामद भएको थियो ।

नक्कली नोटसहित पक्राउ परेका सक्सेनालाई आवश्यक कारवाहीको लागि इलाका प्रहरी कार्यालय बंकुलमा बुझाइएको पनि ससस्त्र प्रहरी कार्यालय रौतहटले जनाएको छ ।