एसपीपीबारे बैठकमा उपस्थित भएर जवाफ दिन संसदीय समितिले प्रधानसेनापतिलाई पठायो पत्र

२ असार, काठमाडौं । मिसन मुलुकहरूको भ्रमणको तयारीमा रहेका नेपाली सेनाका प्रधानसेनापति प्रभुराम शर्मालाई स्टेट पार्टनरसिप प्रोग्राम (एसपीपी) सम्झौतामा हस्ताक्षरको विषयमा जानकारी लिन प्रतिनिधिसभाको अन्तर्राष्ट्रिय सम्बन्ध समितिले बोलाएको छ ।

सरकारले अमेरिकासँग एसपीपी सम्झौता गरेको भन्ने विषय सार्वजनिक भएपछि प्रतिनिधिसभाको अन्तर्राष्ट्रिय सम्बन्ध समितिले प्रधानसेनापति शर्मालाई बोलाएको हो ।

संसदीय समितिले शुक्रबार बिहान ९ बजेका लागि बस्ने तय भएको बैठकमा प्रधानसेनापतिलाई एसपीपीबारे छलफल गर्नका लागि बोलाएको जनाएको छ ।

समिति सभापतिले एसपीपीका विषयमा विभिन्न कुरा सार्वजनिक भएपछि प्रधानसेनापति शर्मालाई स्पष्ट पार्नका लागि बोलाइएको जानकारी दिएको छ ।

एसपीपी कार्यक्रम २०१५ देखि सुरुवात भएको कुरा सार्वजनिक भएको र यसको आधिकारीक कुरा के हो ? यसमा सेनाको धारणा के हो ? सन् २०१५, २०१७ र २०१९ मा एसपीपीबारे के–के भएको हो भन्ने बुझ्नका लागि बोलाएका बताइएको छ ।

शुक्रबारको बैठकमा विविध कार्यसूचीअन्तर्गत एसपीपीको विषयमा छलफल गर्न रक्षा मन्त्रालयका सचिव किरणराज शर्मालाई पनि संसदीय समितिले पत्र पठाएको छ ।