सेनालाई एसपीपी मान्य नभएकाले मेरो तहबाट अमेरिकामा कुनै सम्झौता हुँदैनः प्रधानसेनापति

३ आसार, काठमाडौं । प्रधानसेनापति प्रभुराम शर्माले एसपीपी कार्यक्रम नेपाली सेनालाई मान्य नभएको बताउँदै आफ्नो अमेरिका भ्रमणका क्रममा यसबारे कुनैपनि सम्झौतामा हस्ताक्षर गर्ने कार्यक्रम नरहेको बताएका छन् । प्रतिनिधिसभाको अन्तर्राष्ट्रिय सम्बन्ध समिति बैठकमा शुक्रबार प्रधानसेनापति शर्माले एसपीपी नआएको र आए पनि मान्य नहुने बताए ।

सुरुमा मानवीय सहयोगका लागि कुरा आएकोले पत्राचार भएको उनको भनाइ थियो । शर्माले आफ्नो अमेरिका भ्रमणमा कुनै सम्झौता गर्ने कार्यक्रम नरहेको बताए । बैठकमा अमेरिकाको स्टेट पार्टनरसीप प्रोग्राम (एसपीपी) बारे स्पष्ट पार्दै सेनाले सैन्य गठबन्धनको सम्झौता नगरेको दावी गर्दै एसपीपीसम्बन्धी बाहिर आएको कागजात पनि सरकारी नभएको उनले बताए ।

संयुक्त राज्य अमेरिकाको औपचारिक निमन्त्रणामा असार १३ गतेदेखि १७ गतेसम्म अमेरिकाको वासिङ्टन डीसी पुगेर फर्कने कार्यक्रम रहेको बताउँदै उनले भने,‘एसपीपीको डकुमेन्ट सरकारी होइन । यसमा हाम्रो संलग्नतामा छैन । यो कुनै प्रकारले बाहिर आएको हुनसक्छ । अमेरिका भ्रमणमा मेरो तहबाट कुनै सम्झौता हुने कार्यक्रम छैन ।

सेनाले अमेरिकी दूतावासलाई लेखेको पत्र भने साँचो भएको प्रधानसेनापति शर्माले स्पष्ट पारे । ‘सेनाले लेखेको चिठी बाहिर निस्केर सनसनी फैलाएको वाला सत्य हो । २७ अक्टोबर २०१५ मा लेखेको हो । नेपालमा भर्खर भूकम्प आएर २७ देशबाट सैनिक आएर मित्रराष्ट्रका सैनिक गैरसैनिक आएको लेखिएको साँचो हो । यो चिठीको सैन्य गठबन्धन हुन होइन । यो चिठी लेख्दैमा सैन्य गठबन्धन हुने कुराको म विरोध गर्न चाहन्छु,’ प्रधानसेनापति शर्माले भने ।

अमेरिकाको युटा राज्यबाट सहयोग सामग्री लिन सहज हुने भएकाले त्यसपछि पनि २ वटा चिठी लेखिएको उनले बताए । ’पछि २ चिठी पनि लेखिएको हो । अमेरिकी सरकारबाट युटा राज्यको एसपीपी सामग्री दिनका लागि दिन अमेरिकी सरकारले एसपीपीबाट दिने र सजिलो हुने भएपछि मानवीय सहयोग नेपालमा ल्याउन लेखिएको हो । नेपालको बर्खिलाप जाने भनेर र सैन्य गठबन्धनमा जाने भनेर होइन ।

सेना परराष्ट्र नीतिमा स्पष्ट भएको भन्दै शर्माले तत्कालीन प्रधानमन्त्री तथा रक्षामन्त्रीको स्वीकृतिमा नै पत्र लेखेको बताए । तत्कालीन प्रधानमन्त्री र रक्षामन्त्रीको स्वीकृतिमा पत्र लेखिएको हो । तत्कालीन रुपमा एसपीपी सैन्य गठबन्धनमा थिएन । सन् २०१९ मा आईपीएसमा एसपीपी गएपछि हामीले असजिलो हुन्छ भनेर सरकारलाई रिभ्यू गर्न भनेका हौँ ।’