प्रधानमन्त्री बोकेर सुदूरपश्चिम उडेको हेलिकोप्टर भैरहवामा आकस्मिक अवतरण

३ असार, काठमाडौं । सुदूरपश्चिमका लागि उडेको प्रधानमन्त्री शेरबहादुर देउवा सवार हेलिकोप्टर भैरहवामा आकस्मिक अवतरण गरिएको छ ।

प्रहरीका अनुसार नेपाली सेनाको हेलिकोप्टरमा उडे लगत्तै इन्धन सकिएको सिंग्नल पाएपछि चालकले भैरहवामा अवतरण गराएका हुन् ।अहिले प्रधानमन्त्री देउवा सवार हेलिकोप्टर इन्धन भरेर गन्तव्यतिर लागेको छ ।

सुदूरपश्चिममा हुने एक कार्यक्रमका लागि धनगढी जान लागेका प्रधानमन्त्री देउवा सवार हेलिकोप्टरमा इन्धन सकिएपछि गौतमबुद्ध अन्तर्राष्ट्रिय विमानस्थलमा अवतरण गरिएको थियाे । इन्धन सकिएर गतब्यमा नपुग्ने भएपछि गौतमबुद्ध अन्तर्राष्ट्रिय विमानस्थलमा अवतरण गरिएको बताइएको छ ।

प्रधानमन्त्री देउवा सुदूरपश्चिम विश्वविद्यालयको दीक्षान्त समारोहमा सहभागी हुन काठमाडौंबाट नेपाली सेनाको हेलिकोप्टरमा गएका थिए ।विमानस्थल प्रहरी अधिकारीका अनुसार विमानस्थलमा अवतरण भएपछि २० मिनेट बढी प्रधानमन्त्री देउवाले नेता–कार्यकर्तासँग भेट गरेका थिए ।

इन्धन भरेपछि हेलिकोप्टर सुुदूरपश्चिम उडिसकेको छ । सामान्यतया गन्तब्यसम्म पुग्नका लागि पर्याप्त इन्धन भरेर मात्रै उडान भर्ने गरिन्छ । तर, सुरुमा चेकजाँच नगरेकाले यस्तो भएपनि दुर्घटनाबाट भने बचेको छ ।