भुटानी शरणार्थी नेता भम्पा राईको निधन

५ असार, झापा । भुटानी शरणार्थी नेता डा.भम्पा राईको निधन भएको छ । ७५ वर्षीय राईको आइतबार बिहान २ बजे विराटनगरस्थित नोबेल अस्पतालमा उपचारका क्रममा निधन भएको हो ।

उनको हर्नियाको शल्यक्रिया गरिएको थियो । शनिबार दिउँसोदेखि मुटुको चाल कम भएका राईको उपचारकै क्रममा निधन भएको उनकी भाञ्जी गौरी राईले जानकारी दिइन् ।

तीस वर्षदेखि भुटानी शरणार्थीको स्वदेश फिर्ती आन्दोलनको नेतृत्व गर्दै आएका राई दमकमा एक्लै बस्दै आएका थिए । दुई वर्षअघि पत्नि उर्मिलाको निधन भएपछि उनी दमकस्थित डेरामा एक्लै बस्दै आएका हुन् ।

राईको पार्थिव शरीरको आइतबार नै किरात संस्कारअनुसार दमक नजिकैको पाडाजुँगीस्थित रतुवामाई वृक्षारोपणको जंगलमा अत्येष्टि गरिने जनाइएको छ ।