पूर्वमन्त्री कार्कीको घर अगाडि शंकास्पद वस्तु फेला, निष्कृय पार्न सेनाको टोली पुग्दै

१० असार, काठमाडौं । नेकपा एमालेका नेता तथा प्रदेश १ का पूर्वमन्त्री हिक्मत कार्कीको घर अगाडि प्रेसर कुकर बमजस्तो देखिने शंकास्पद वस्तु भेटिएको छ ।

आज शुक्रबार बिहान करिब साढे ५ बजे झापाको गौरादह नगरपालिका–३ गौरादह बजारमा रहेको कार्कीको घर अगाडि प्रेसर कुकर बमजस्तो देखिने शंकास्पद वस्तु फेला परेको हो । प्रेसर कुकरमा तार बेरेर राखेको अवस्थामा भेटिएको शंकास्पद वस्तु निष्कृय पार्न नेपाली सेनाको टोली पुग्दै छ ।

घर अगाडि शंकास्पद वस्तु भेटिएपछि सामाजिक सञ्जालमा तस्विर राख्दै उनले लेखेका छन्,‘किन, कसले हो ? छिट्टै अनुसन्धान हुनेछ । अहिले जिल्ला प्रशासन झापाको नेतृत्वमा नेपाली सेनाद्वारा निष्क्रिय पार्ने तयारी हुँदैछ ।’

घर अगाडि शंकास्पद वस्तु भेटिएपछि प्रहरीलाई कार्कीले आफै खबर गरेका हुन् ।