रोपाइँ गर्ने खेतमा खुट्टा हालेपछि कृषिमन्त्री यादवले थाहा पाए मलको अभाव

१५ असार, काठमाडौं ।  १९ औं राष्ट्रिय धान दिवस तथा रोपाइँ महोत्सवको अवसरमा खुमलटारस्थित राष्ट्रिय बाली विज्ञान अनुसन्धान केन्द्रको फार्ममा आयोजित कार्यक्रममा सहभागी हुन बुधबार बिहान सो क्षेत्रमा पुगेका कृषि तथा पशुपन्छी विकासमन्त्री महिन्द्र राय यादवले हिलोमा खुट्टा हालेपछि कृषकलाई मलको ठूलो अभाव रहेको अनुभव आफुलाई भएको बताएका छन् ।

उनले मलको यस्तो समस्या टार्न अब निजी क्षेत्रलाई दिएर भएपनि कृषकलाई मल उपलब्ध गराउने बताए । मन्त्री यादवले रसायनिक मल अभाव हुनुमा ठेकदार दोषी रहेको जिकिर गर्दै मलको ठेक्का प्रणाली राम्रो नभएको र अब निजी क्षेत्रलाई मल ल्याउन दिने विषयमा सोच्ने बेला आएको बताए ।

अन्तर्राष्ट्रिय बजारमा मलको मूल्यवृद्धि हुनु र ठेक्का पाएका ठेकदारको बेवास्ताका कारण मल ल्याउन नसकिएको मन्त्री यादवले बताए । मन्त्री यादवले लागेको ठेक्काबाट पनि मल नआएको बताए । भारतले लामो समयपछि मंगलबार १५ हजार मेट्रिकटन रासायनिक यूरिया मल दिने भनेको पनि मन्त्री यादवले जानकारी दिए ।

अहिले कृषकलाई यूरिया मल अभाव भएको बताउँदै उनले डीएपी भने पुग्ने र आउने क्रममा रहेको मन्त्री यादवले बताए । मलको ठेक्का प्रणाली राम्रो नभएको भन्दै मन्त्री यादवले पेट्रोलियम पदार्थ आयात गरेजस्तै मल आयात गर्नुपर्ने बताए । उनले निजी क्षेत्रलाई मल ल्याउन दिने कि नदिने भनेर सोच्ने बेला भएकोसमेत बताए ।