छोरा २५ वर्ष पुगेपछि बुबाको खबर पाउँदा : आमा अर्कैसँग पाेइल

२२ असार , कर्णाली । तातोपानी गाउँपालिका–१ जुम्ला बाइराँका गाउँका दलबहादुर सार्की (दले) २४ वर्षपछि आफन्तको सम्पर्कमा आएका छन्। उनी विसं २०५५ मा घरबाट निस्केएको थिए ।

मङ्गलबार मात्र भारत हिमाञ्चल प्रदेश कुल्लु जिल्लाको मनाली भन्ने सहरमा भेटिएको वैदेशिक रोजगारका लागि कतार गएका उनका भाइ जगमुन सार्कीले जानकारी दिए ।

“यतिका वर्षसम्म दाइ कहाँ हुनुहुन्थ्यो थाहा भएन”, जगमुनले भने, “कामका लागि भारतमा गएका माइलो दाई (दलबहादुर सार्की)ले भेटाए । जेठो दाइ भेटिएको खबरले निकै प्रफुलित बनायो । हिजो नै दाइसँग भिडियो कलमै कुरा गरेर लामो समयसम्मको भ्रातृप्रेमको धित मेटाएँ ।”

घरमा श्रीमतीसँग भएको झगडाका कारण विरक्तिएर हिँडेका दलबहादुरलाई परिवारले लामो समयदेखि खोजी गर्दै आइरहेको थियो । दाजु घरबाट सम्पर्कविहीन भएपछि त्यसको लगत्तै भाउजुले नाबालक बच्चालाई छोडेर अर्कैसँग विवाह गरेको जगुमानले बताए ।

दलेको छोरा कृष्ण सार्की यतिबेला २५ वर्षको भइसकेका छन् । तर छोरालाई आफ्ना बाबा छन् भन्ने कुरा थाहा थिएन । कृष्ण यतिबेला घरमै छन् । गाउँका सबैले कृष्णलाई बाबा मरिसकेका कुरा सुनाउथे । हुन पनि बाबाको अत्तोपत्तो थिएन । बाबा भेटिएको खबर सुनेका उनलाई कल्पनाभन्दा बाहिरको कुरा जस्तो लागिरहेको छ ।

नाबालक अवस्थादेखि बाबा भन्न नपाएका कृष्णको आमाले अर्कैसँग विवाह गरेपछि आमाबाबा भएर पनि उनी टुहुरा जस्तै भएका थिए । घरबाट हराएका दलबहादुर लामो समयसम्म घर नफर्केपछि परिवारले पुनःमिलन हुने कुराको आश मारिसकेका थिए ।

कृष्णका अनुसार बाबा भेटिएको कुरा मनालीमा काम गर्न गएका माइला बाबा कले सार्कीले जानकारी दिए । त्यो खबरले अहिले उनको खुशीको सीमा छैन । कृष्णले बाबासँग फोनबाट कुरा गरेको बताए । उनले भने, “बाबासँग फोनमा कुरा गरे । मेरो बाबासँग बोल्न पाउँदा साँच्चिकै उहाँ स्वर्गबाट झरेजस्तो लागिरहेको छ । अब चाँडै नेपाल आउँछु ।”

जगमुनले काम गर्ने दौडानमा हिँडिरहेका बेलामा दाइ (दलबहादुर)सँग भेट भएको बताए । “दाई मनालीमा भेटिएपनि उनी लद्दाख बस्ने रहेछन्”, जगमुनले भने, “व्यावसायिक लाइसेन्स बनाउन आउए रहेछन्। सौभाग्यवशः मनालीमा भेट भयो ।” भेट हुँदा सुरुमा उनले आफूलाई नचिनेको जनाए ।

दलबहादुरले गाउँ, समाज र परिवार सबैको याद आए पनि कामको सिलसिलाले बिर्से जस्तो भएको अनुभूति सुनाए । “म २०५५ सालमा भारत छिरे । त्यतिबेला नेपालमा चरम द्वन्द्वको समय थियो ।

सहजै घर जानसक्ने अवस्था थिएन”, उनले भने, “पछिल्ला दिनमा कसैसँग भेटघाट र फोन सम्पर्क हुन सकेन । बस्दा बस्दा वर्षौं बितेको पनि पत्तै पाइन ।”

भाइका साथै छोरा कृष्णसँग कुरा भएको जनाउँदै उनले दुई÷तीनपछि नेपालगञ्जसम्म गएर पुनःभारत फर्कने र दसैँको समयमा घरपरिवार भेट्न जुम्ला पुग्ने बताए ।