नख्खु कारागारबाट सेना व्यारेकतिर, सशस्त्रलाई थप जिम्मेवारी

२४ असार, काठमाडौं । सरकारले तीन वर्ष अघि सशस्त्र प्रहरी बल (एपीएफ) लाई कारागार सुरक्षाको जिम्मेवारीबाट हटाएर नेपाली सेनालाई सुरक्षाको जिम्मा दिएको थियो । देशभरकै कारागारको सुरक्षामा नेपाल प्रहरी र प्रदेश प्रहरीलाई खटाउने गरी सशस्त्रलाई ब्यारेक फर्काइएको थियो ।

नख्खु, भीमफेदी, दाङ, झुम्कालगायत करिब एक दर्जन कारागारको सुरक्षा त्यसअघि सशस्त्र प्रहरीले गर्दै आएपनि त्यहाँ सेना र प्रहरी खटाउने निर्णय भएको थियो । तर केही दिन अघि नख्खु कारागारको सुरक्षामा सशस्त्र प्रहरीले डीएसपीको कमाण्डमा एउटा टुकडी खटाइएको छ ।

२०७७ वैशाख २० गते गृहमन्त्री रामबहादुर थापाको अध्यक्षतामा बसेको सुरक्षा बैठकले कारागार र भवन÷प्रतिष्ठान सुरक्षामा खटिएका सशस्त्रलाई सीमामा परिचालन गरेर त्यस ठाउँमा सेना र प्रहरी खटाउने निर्णय गरेको थियो । त्यसकै आधारमा पछिल्लो पटक अस्थायी प्रयोजनका लागि सेना र प्रहरी कारागार सुरक्षामा खटिएका थिए । नख्खु कारागारमा सेना खटिइसकेको थियो ।

प्रहरी समायोजन टुंगिएपछि सबै कारागारमा नेपाल प्रहरी र प्रदेश प्रहरीलाई खटाइने कारागार व्यवस्थापन विभागका अधिकारीले जानकारी दिएपनि अहिलेसम्म प्रहरी नखटिएको भन्दै सेनाले कारागारको सुरक्षा अस्वीकार गरेका कारण मन्त्रालयले सशस्त्र प्रहरीलाई खटाएको हो ।

‘विशेष परिस्थितिमा अन्य सुरक्षा निकायलाई अस्थायी सुरक्षा व्यवस्थापनको जिम्मा दिइएको थियो अहिले त्यो परिस्थिति भन्दा भिन्न रहेका कारण सेनालाई व्यारेक फिर्ता गरेर सशस्त्र प्रहरीलाई जिम्मा दिइएको हो’, स्रोतले भन्यो । अहिले सशस्त्र प्रहरीका डीएसपी बासुदेव लोहनीको कमाण्डमा नख्खु कारागारको सुरक्षा भैरहेको छ ।

सीमा सुरक्षामा जनशक्ति कम भएको भन्दै सशस्त्रले जनशक्ति थप गर्ने प्रस्ताव गरेको भएपनि जनशक्ति अभाव भएकै बेला मन्त्रालयले कारागारको जिम्मेवारी पनि दिएको छ । ‘मन्त्रालयले सुरक्षाका लागि खटायो हामीले जिम्मा लियौ’, सशस्त्र प्रहरीका एक अधिकारीले भने ।