पूर्वप्रधानमन्त्री शिन्जो आबेको हत्या भएको दुई दिनपछि जापानमा निर्वाचनमाः आबेको पार्टी विजयी हुने अनुमान

२७ असार, टोकियो । जापानमा भएको निर्वाचनमा सत्तारुढ गठबन्धनले सबैभन्दा बढी मत प्राप्त गर्ने अनुमान गरिएको स्थानीय सञ्चारमाध्यमले जनाएका छन् । जापानका पूर्वप्रधानमन्त्री शिन्जो आबेको हत्या भएको दुई दिनपछि आइतबार सम्पन्न निर्वाचनमा सत्तारुढ लिबरल डेमोक्रेटिक पार्टी (एलडीपी) विजयी हुने अनुमान गरिएको हो ।

१२५ सिट भएको माथिल्लो सदनमा पूर्वप्रधानमन्त्रीको पार्टी एलडीपी र यसको गठबन्धन कोमेटोले ७० देखि ८३ सिट ल्याउने अनुमान गरिएको राष्ट्रिय प्रसारक एनएचकेले जनाएको छ । आबेको हत्या हुनु अघि कोमिटोले आफ्नो बहुमत ल्याउने अपेक्षा गरिएको थियो ।

आबेको हत्याले सत्तारुढ लिबरल डेमोक्रेटिक पार्टी एलडीपी प्रति समर्थन बढेको हुनसक्ने विश्लेषकहरू बताउँछन्। आबे एलडीपीका प्रभावशाली तथा अग्रणी नेता थिए । तुलनात्मक रूपमा कम शक्तिशाली माथिल्लो सदनको चुनावलाई अधिकांशतः सत्तारुढ दलको जनमत सङ्ग्रहका रूपमा हेर्ने गरिन्छ।

आबे जापानमा सबभन्दा लामो समय प्रधानमन्त्री पदमा रहेका व्यक्ति हुन् । निधन हुँदा उनी ६७ वर्षका थिए। उनले आइतबारको राष्ट्रियसभा निर्वाचनमा एलडीपीको प्रचार गरिरहेका थिए।

आबे पहिलो पटक सन् २००६ मा प्रधानमन्त्री बनेका थिए र पछि २०१२ देखि २०२० सम्म प्रधानमन्त्री बनेपछि स्वास्थ्य अवस्थाको कारण देखाउँदै राजीनामा दिएका थिए।