सट्टा भर्नाका लागि अर्को एम अधिकारी नभेटिएपछि एमालेलाई फसाद

३० असार, काठमाडौं । पार्टीमा झण्डै १० लाख क्रियाशील कार्यकर्ता रहेको दावी गर्दै आएको नेकपा एमालेले एम अधिकारी नाम गरेको अर्को व्यक्ति सोही जिल्ला वा बसाइँ सरेको अवस्थामा पनि फेला पार्न नसकेपछि  फसादमा परेको छ ।

एमालेको अर्थ तथा योजना विभागमा लामो समयदेखि एम अधिकारी सदस्य रहँदै आएको र उक्त व्यक्ति गभर्नर भएको चर्चा अहिले बजारमा चलिरहेको छ । एम अधिकारी र महाप्रसाद अधिकारी फरक भएको दावी गर्दै एमालेले सोही नामको व्यक्ति खोटाङ वा सो क्षेत्रबाट बसाइँ सरेर गएको भएपनि खोजी गर्न आन्तरिक अभियान चलाएको बताइएको छ ।

एमाले निकट स्रोतले दिएको जानकारी अनुसार खोजीका क्रममा एम अधिकारी नाम भएको व्यक्ति भोजपुर जिल्लाको पैँयापानी भन्ने ठाउँमा रहेको तर, उमेर समूह र जिल्ला नमिलेकाले भएन । खोटाङ जिल्लाकै हुनुपर्ने वा सो जिल्लाबाट अन्यत्र बसाइँ सरेको भएपनि हुने भन्दै खोजी गरिएको थियो, आजसम्म भेटिएको छैन् ।

एमालेको अर्थ तथा योजना विभागमा सदस्य रहेका एम अधिकारी नै अहिलेका गभर्नर महाप्रसाद अधिकारी भएको भन्दै केही दिनदेखि विवाद सुरु भएपछि एमालेले एम अधिकारी र महाप्रसाद अधिकारीबीच कुनै सम्बन्ध नरहेको भन्दै प्रतिवाद गर्दै आएको थियो । तर, सो विभागमा विगतदेखि काम गरिरहेको भन्न मिल्ने र उमेर समूहसमेत मिल्ने खालको अर्को व्यक्ति सोही क्षेत्रमा पार्टीमा नभेटिएपछि एमाले फसादमा परेको हो ।

केही दिन अघि एमाले अध्यक्ष केपी ओलीले जारी गरेको अन्तरपार्टी निर्देशिकामा स्थायी कमिटी सदस्य घनश्याम भुसाल नेतृत्वको अर्थ तथा योजना विभागमा खोटाङका एम अधिकारीको नाम राखिएको छ । यही निर्देशिका बाहिरिएपछि यो रहस्य पनि बाहिरिएको हो ।

भुसालले समेत अन्तरपार्टी निर्देशिकामा नाम भएको व्यक्ति महाप्रसाद अधिकारी नभएको बताएका छन् । तर, अर्को नाम खोजेर भएपनि आफुलाई यो विवादबाट बचाउन कोसिसमा लागेको एमालेले भरपर्दो अर्को आधार दिन सकेको छैन् ।

एम अधिकारी गभर्नर महाप्रसाद अधिकारी नै हुन भन्ने अर्को गतिलो प्रमाण के पनि रहेको छ भने २०७३ मा सुरेन्द्र पाण्डे प्रमुख रहँदा उनी महाप्रसाद अधिकारीकै नामबाट एमालेको विभागको सदस्य थिए । यो सत्य बाहिरिएपछि एमाले मात्र हैन स्वयम गभर्नर महाप्रसाद अधिकारी समेत संकटमा परेका छन् ।

गत वैशाखमा सम्पन्न एमालेको केन्द्रीय सचिवालयले विभिन्न सांगठनिक निर्णय गरेको थियो । सोहीअनुसार भुसाल नेतृत्वको अर्थ तथा योजना विभागको सदस्यमा खोटाङका एम अधिकारीलाई पनि राखिएको छ ।

गत वैशाखमा केन्द्रीय सचिवालय बैठकले गरेका निर्णयबारे जानकारी दिन भन्दै एमालेले अन्तरपार्टी निर्देशन जारी गरेको हो । सोही निर्देशन बाहिरिएपछि अर्थ तथा योजना विभागमा रहेका एम अधिकारी भन्ने व्यक्ति राष्ट्र बैंकका गभर्नर अधिकारी नै हुन् भन्ने प्रश्नले नयाँ विवाद सिर्जना गरेको छ ।