इलाका प्रशासन कार्यालयको सेवा दैनिक बनाउन माग गर्दै पर्सा कांग्रेसले पठायो प्रधानमन्त्रीलाई ज्ञापन

१ साउन, बीरगञ्ज । मतदाता नामावली संकलनका लागी गाउँगाउँमा टोली पठाउनु पर्ने लगायतका माग राख्दै नेपाली कांग्रेस पर्साले प्रमुख जिल्ला अधिकारीमार्फत प्रधानमन्त्रीलाई ज्ञापनपत्र पठाएको छ । संघ र प्रदेशको निर्वाचनलाई मध्यनजर गर्दै अहिले जिल्ला निर्वाचन कार्यालयबाट मात्रै मतदाता नामावली संकलनको काम हुँदा गाउँगाउँबाट नामावली दर्ता गराउन आउनेहरु समस्यामा परिरहेको भन्दै तत्काल समस्याको समाधान गर्न माग गरिएको छ ।

स्थानीय तहको निर्वाचनका समयमा मतदाता नामावली संकलन गर्न हरेक गाउँपालिकामा टोली पुगे जस्तै अहिले पनि टोली गाउँगाउँ जाने व्यवस्था मिलाउन कांग्रेसले माग गरेको छ । यस्तै सुख्खा खडेरीका कारण धान रोप्न समस्यामा परेका कृषकलाई सिंचाईको व्यवस्थाका साथै मलखादको व्यवस्था मिलाउन पनि कांग्रेसले माग गरेको छ ।

जिराभवानी गाउँपालिकाको सुपौलीमा रहेको ईलाका प्रशासन कार्यालय दैनिक सञ्चालन नहुँदा त्यस क्षेत्रका सेवाग्राहीले सास्ती भोगिरहेको भन्दै तत्काल कर्मचारी व्यवस्थापन गरी हरेक दिन कार्यालय सञ्चालनमा ल्याउन पनि माग गरिएको छ । जनशक्ति अभावमा हप्ताको एक दिन मात्रै कार्यालय सञ्चालन हुँदा त्यस क्षेत्रका ४ वटा पालिकाका नागरिक नागरिकता बनाउन तथा विभिन्न सेवालिनबाट सास्ति ब्यहोर्दै आएका छन् ।

यस्तै पोखरीया नगरपालिकामा पनि इलाका प्रशासन कार्यालय थप गर्न कांग्रेसले माग गरेको छ । द्वन्द्वकालमा बन्द भएको इलाका प्रशासन कार्यालय अहिले पुनः सञ्चालनमा ल्याउन उसले माग गरेको हो । वीरगंजमा रहेको जिल्ला प्रशासन कार्यालयमा धाउनु पर्ने समस्या अन्त्य गर्न र यहाँको चाप कम गर्न पनि अर्को स्थानमा इलाका प्रशासन कार्यालय स्थापना गर्नु पर्ने आवश्यकता रहेको कांग्रेसले औँल्याएको छ । हुलाकी सडकखण्डमा अहिले दिनहुँ सवारी दुर्घटना बढीरहेकाले त्यसको न्यूनिकरण र आवागमन गर्ने सवारी र यात्रीहरुको सुरक्षाका लागि गण्डक नहर नजिक प्रहरी चौकी स्थापना गर्न पनि कांग्रेसले माग गरेको छ ।

आफूहरुले विभिन्न ६ वटा मागहरु उल्लेखित ज्ञापन पत्र प्रमुख जिल्ला अधिकारीमार्फत प्रधामन्त्रीलाई पठाएको कांग्रेस पर्साका सभापति जनार्दन सिंह क्षेत्रीले बताए । ज्ञापनपत्र बुझाउन कांग्रेसका केन्द्रीय सदस्य अजय चौरसिया, मधेस प्रदेशका महामन्त्री बृहस्पतीकृष्ण श्रेष्ठ, पूर्वमन्त्री सुरेन्द्र चौधरी, रामनारायण कुर्मी लगाएतका नेताहरु पुगेका थिए ।