भलिवल नेसन्स लिगको उपाधि इटालीलाई

२ असार, काठमाडौं । भलिबल नेसन्स लिग (भिएनएल) २०२२ अन्तर्गत महिलातर्फको उपाधि इटालीले जितेको छ । आइतबार राति टर्कीमा सम्पन्न प्रतियोगितामा युरोपियन च्याम्पियन इटालीले ब्राजिललाई २५–२३, २५–२२, २५–२२ को सोझो सेटमा हरायो । योसँगै ब्राजिल फाइनलमा लगातार तेस्रोपटक हार बेहोर्न बाध्य भएको छ ।

यस्तै, सर्विया तेस्रो भयो । उसले तेस्रो स्थानका लागि भएको खेलमा टर्कीलाई २७–२५, २५–१७, २६–२४ ले पराजित गर्‍यो । सन् २०१८ देखि सुरु भएको भिएनएलमा अमेरिका सर्वाधिक तीनपटकको च्याम्पियन हो ।

भिएनएलमा महिलातर्फको प्रतियोगिताको सकिएसँगै बुधबारदेखि पुरुषतर्फको क्वार्टरफाइनलका खेल सुरु हुनेछ । क्वार्टरफाइनलको पहिलो खेलमा साविक विजेता ब्राजिल र अमेरिकाबीच प्रतिस्पर्धा हुनेछ ।