एकै दिन ४५७ जनामा कोरोना पुष्टि, एक संक्रमितको मृत्यु

२ साउन, काठमाडौं । नेपालमा केही दिनदेखि कोरोना भाइरस संक्रमण फेरि उकालो लाग्न थालेको छ । पछिल्लो २४ घण्टामा नेपालमा साढे चार सयभन्दा बढीमा कोरोना संक्रमण पुष्टि भएको छ ।

स्वास्थ्य मन्त्रालयका अनुसार चार हजार ६ सय ५१ जनाको कोभिड परीक्षण गर्दा चार सय ५७ जनामा संक्रमण पुष्टि भएको हो । २३ सय ४१ को पीसीआर र २३ सय १० जनाको एन्टीजेन परीक्षण गरिएको थियो । पीसीआर परीक्षणबाट तीन सय ८६ र एन्टीजेन परीक्षणबाट ७१ जनामा संक्रमण पुष्टि भएको हो ।

यसैबीच कोभिड संक्रमणका कारण एक जनाको ज्यान पनि गएको छ । हाल नेपालमा १७ सय ७६ जना संक्रिय कोरोना संक्रमित रहेको मन्त्रालयको भनाइ छ ।