सशस्त्रमा ‘ज्वाई’ एसएसपीको आतंकः भावी आईजीपी हुने तयारीमा यस्तो छ उनको रकेट यात्रा

१० साउन, काठमाडौं । सशस्त्र प्रहरीमा कोही कसैले विशेष लाभ लिएको छ भने ती व्यक्ति हुन् –एसएसपी दीपेन्द्र कुँवर ‘ख’ मात्रै । प्रधानमन्त्री शेरबहादुर देउवाका स्वकीय सचिव भानु देउवाका आफ्नै बहिनी ज्वाई भएकै कारण विगत धेरै वर्षदेखि उनले विशेष लाभ लिइरहेका छन् । सो नाताकै कारण उनले भावी आईजीपीको यात्रा रकेट गतिमा तय गरेका छन् । उनको यो यात्राले सशस्त्र प्रहरीलाई दुईधारमा विभाजित गरिदिएको छ ।

एसएसपी कुँवर सशस्त्र प्रहरीको एसएसपी बढुवामा एक नम्बरमा बढुवा सिफारिस गरिएको भन्दै सर्वत्र आलोचना भएपनि त्यसलाई कुनै मतलव राखिएको छैन । बिगतमा उनको वरियता निकै पछि र कार्यसम्पादन समेत कमजोर भएका कँुवरलाई शक्तिको आडमा बढुवामा एक नम्बरमा ल्याइएपछि उनको विषयमा निकै जोडजोडका साथ चर्चा परिचर्चा हुन थालेको छ । ‘नेपाल प्रहरीमा विश्वराज पोखरेलले यसैगरी रकेट यात्रा तय गर्दा बीचमै फेल भएका थिए, कुँवरको हकमा पनि यही उदाहरण लागु हुनसक्छ’, सशस्त्र प्रहरी स्रोतले भन्यो ।

प्रधानमन्त्री देउवाका स्वकीय सचिव भानु देउवाका बहिनी ज्वाई रहेका कँुवरको गत शुक्रबार भएको बढुवा सिफारिसमा उनको व्याचबाट एक नम्बर बनाइएको थियो । गृहमन्त्री बालकृष्ण खाँड, गृहसचिव टेकनारायण पाण्डे र सशस्त्र प्रहरी महानिरीक्षक राजु अर्याल उनलाई दुई नम्बरमा बढुवा गर्ने पक्षमा थिए । तर, प्रधानमन्त्री देउवाले गृहमन्त्री खाँड र गृहसचिव पाण्डेलाई बालुवाटार बोलाएर उनलाई एक नम्बरमा बढुवा गर्न दबाब दिएको स्रोतको दावी छ ।

अहिले एसएसपीमा आफ्नो ब्याचबाट एक नम्बरमा बढुवा सिफारिस भएका कँुवरलाई यत्तिमै सीमित राख्ने मात्र अवस्था नदेखिएको सशस्त्र प्रहरी बल स्रोतले जनाएको छ । उनलाई रिक्त तीन वटा डीआईजीको पदमा बढुवा गर्ने खेल समेत भइरहेको स्रोतको दावी छ । किनकी डीआईजी र त्योभन्दा माथि बढुवा हुने सेवा अवधिको हद तोकिएको छैन । त्यसैले उनलाई झन सहज बनाएको छ ।

कुँवरलाई बढुवा गर्ने विषयमा कुरा नमिल्दा एक दुई साता नै बढुवा प्रक्रिया रोकिएको थियो । सशस्त्र प्रहरीका आईजीपी अर्यालले सुरुबाट विष्णु भट्टलाई एक नम्बरमा बढुवा गर्नुपर्ने र उनको कार्यसम्पादन मुल्यांकन पनि राम्रो रहेको बताएका थिए । तर प्रधानमन्त्रीले नै दबाब दिएपछि अर्यालको पनि केही जोड चलेन । ‘क्षमता र कार्यसम्पादन राम्रो भएको भए त उनलाई अघि ल्याउनु पनि ठिकै थियो । तर, त्यो दुवै कँुवरमा पाइंदैन । वरियतामा समेत निकै पछि रहेकालाई एक नम्बरमा बढुवा गर्ने काम राम्रो भएन । यसले संगठनमा अरु अधिकृतहरुको मनोवल घटाउने काम भएको छ’, एक प्रहरी कर्मचारीले भने ।

कुँवर २०५९ चैत्र ७ मा सशस्त्र प्रहरी निरीक्षक पदमा सेवा प्रवेश गरेका हुन् । सुरुमा उनी ७८ जनाको व्याचमा ७३ नम्बरमा थिए । तर, डीएसपी हुँदा भने ६८ नम्बरमा बढुवा भए । तर अहिले चार वर्षमै उनी एक नम्बरमा बढुवा भए । जबकि उनले १३ महिना तालिममा बिताएका छन् । कुँवर डीएसपी हुँदा दुई ठाउँको कमाण्ड गर्ने भाग्यमानी अधिकृत हुन् । उनी एसपी हुँदा पर्साजस्तो जिल्लामा गणपति थिए । कामु एसएसपी हुँदा उनी इन्टेलिजेन्समा कार्यरत रहे भने अहिले प्रबन्ध शाखाको प्रमुख रहेका छन् । उनले देउवा परिवारको शक्तिको बलमा सधंै लाभको पद हासिल गरेका हुन् । तत्कालिन सशस्त्र प्रहरी प्रमुख शैलेन्द्र खनालले उनलाई एसपी हुँदा ११ औं नम्बरमा बढुवा गरेका थिए । खनाल हुँदा नै उनलाई सेटिङ गरेर नेपाली सेनामा स्टाफ कलेज गर्न पठाइएको थियो ।

कुँवर सशस्त्र प्रहरीको स्टाफ कलेजमा दुई पटक अनूर्तिण भएका थिए । उनी फेल भएपछि बिना प्रतिस्पर्धा समिति बनाएर उनलाई सेनाको शिवपुरीमा हुने स्टाफ कलेज कोर्समा पठाइएको थियो । जबकी सशस्त्र प्रहरीमा पुष्पराम केसी, नारायणबावु थापा, राजु अर्याल, विष्णु भट्टजस्ता अधिकृतहरुले सेनामा स्टाफ कलेज गरेका थिए । उनलाई बढुवा गर्नकै लागि सशस्त्र प्रहरी नियमवाली २०७२ नै संशोधन गरेर उनलाई एसएसपी बढुवा हुने बाटो समेत खोलिएको थियो ।

सशस्त्रमा एसएसपी हुन चार वर्ष सेवा अवधि पूरा भएको हुनुपर्ने नियमावलीमा उल्लेख थियो । तर, कुँवरकै लागि सरकारले नियमावली संशोधन गरेर तीन वर्ष मात्रै भए पुग्ने बनाएर एक नम्बरको पुरस्कार दियो । त्यतिमात्र होइन सशस्त्र प्रहरीमा कुँवर दुई दुई पटक मेडल थाप्ने भाग्यमानी अधिकृत पनि हुन् । उनको एकपटक त सेनाको स्टाफ कलेजमा तालिम गर्दा गर्दै उत्कृष्ट काम गरेको भन्दै मेडल पाएका थिए । जबकि उनी तालिममा थिए । डीआईजी वंशी दाहाल, एसपी पूर्ण साउद ,विकास घिमिरे समेत अहिले कुँवरको चाकडीमा लागेका छन् ।