धरानका प्रहरी नै दलालीमा लागेको भन्दै युवा समूह आन्दोलित

१० साउन, काठमाडौं । प्रहरी भन्ने वित्तिकै राष्ट्र्सेवक, जनरक्षकका रुपमा सम्झिइन्छ । तर, धरानमा भने केही प्रहरीको भूमिका ठ्याक्कै उल्टो छ । उनीहरु कतिबेला कुन विरामीलाई कहाँ सार्ने ? मुर्दा बोक्न कुन शवबहानसँग कति मोलतोल गर्ने अनि औषधी पसलेसँग कति प्रतिशतसम्म मोलतोल गर्ने भन्ने मात्र ध्याउन्नमा देखिन्छन् ।

हामी नेपाली नामको संस्थाका अनुसार इलाका प्रहरी कार्यालय, धरानमा कार्यरत आधा दर्जन बढी प्रहरीले गर्दै आएको मानविय हित विपरितको कार्यले बीपी कोइराला स्वास्थ्य विज्ञान प्रतिष्ठान नै बद्नाम तुल्याइरहेका छन् । शान्ति सुरक्षाका लागि खटाइएका प्रहरी नै दलालसँग मिलेर अर्थोपार्जनतिर लागेपछि धराने युवाको समूह नै प्रहरी विरुद्ध अभियान चाल्न बाध्य भएको बताइएको छ ।

घोपा बचाउँ अभियान सशक्त रुपमा अघि बढाउँदै हामी नेपाली नामको संस्थाको सहकार्यमा धरानबासी यतिबेला आन्दोलनमा उत्रेका छन् । बीपी कोइराला जस्ता मुर्धन्य व्यक्तित्वको नाममा खोललिएको सरकारी अस्पताल अर्थात् पूर्वाञ्चलकै गहनाका रुपमा लिइने अस्पताल यतिबेला चौतर्फी दलालद्धारा घेरिएको अवस्था छ भने ती दलालबाट विरामी र विरामीका आफन्तजन ठगीने क्रम दिनदिनै बढीरहेको छ । विरामी ठगिएको विषयलाई लिएर घोपा बचाउँ अभियान छेड्नु परेको हामी नेपाली नामक संस्थाका अध्यक्ष सुधन गुरुडको भनाई छ ।

अध्यक्ष गुरुडका अनुसार अस्पताल परिसरमा रहेको इप्रका धरानका प्रहरी मध्येका मनी गिरी, नगेन्द्र राई, टिकाराम कटवाल, भुपेन्द्र पोखरेल, सनम श्रेष्ठ, बालकुमार दाहाल र कृष्ण केसी विरामी ठगी कार्यमा लागि परेका हुन् । यी प्रहरीले अस्पतालको सुरक्षार्थ खटिएको बहानामा विरामी बोक्ने एम्वुलेन्स, मुर्दा बोक्ने शव वाहान र औषधी पसलेसँग कमिशन लिनैका लागि दलालसँग सम्झौता गर्नाले अस्पतालको बद्नामी भइरहेको हो ।

दुर्घटनामा परेको घाइते होस् वा अन्य गम्भीर विरामी नै किन नहोस्, उसलाई बीपी अस्पतालका केही चिकित्सक र नर्ससँग मिलेर रिफर गर्ने नाममा महंगा र दलालीबाट सञ्चालित अस्पतालमा उपचार गराउन लैजाने, मुल्यमा बढोत्तरी गराई शवबहान झिकाउने, विरामी र विरामीका आफन्तलाई औषधी किन्न बजारमा जान नदिएर अस्पताल परिसरमै रहेका केही फार्मेसीका दलालमार्फत अस्पतालकै वार्ड(वार्डमा दुई तीन गुणासम्म महंगो औषधी भिडाउने जस्ता विकृतिले गर्दा सिंगो अस्पताल र त्यहाँ कार्यरत चिकित्सक, स्वास्थ्यकर्मी समेत विवादमा तानिने गरेका छन् ।

प्रहरीको काम शान्ति सुरक्षा मात्र रहेकाले त्यही अनुसारको ड्यूटी खटाउन र मातहतका प्रहरीलाई त्यसैअनुसार खटाउन हामी नेपाली नामक संस्थाका प्रतिनिधिले बारम्बार जिल्ला र प्रदेश प्रहरी कार्यालयका प्रमुखसँग गुनासो गर्दा समेत सम्वोधन नभएको बताए । विगतमा कारवाही परेर तानिएका प्रहरी पुनः फर्काइएकोमा आश्चर्य मान्दै हामी नेपाली नामको संस्थाका अध्यक्ष गुरुड भन्छन्, सेटिङ नभए के हो त ? इमानदारिताका साथ ड्यूटी गर्न अस्पतालमै फर्कीफर्की आउनु पर्छ र ?

गुरुडका अनुसार त्यसरी सोर्स लगाएर अस्पताल ड्यूटीमा खटिनेहरुले माथिसम्मका हाकिमको चित्त बुझाउने गरेका हुन्छन् । “यस्ता दलालबाट अस्पताल जोगाउन अब दलाल सफाया अभियान चलाउनु पर्छ, त्यसका लागि हामी जस्तोसुकै आन्दोलन गर्न पनि तम्तयार छौं” गुरुडले भने ।