फर्पिडका इन्स्पेक्टर सापकोटाकाे चलाखीः कारवाहीबाट जोगिन बिदामा

१० साउन, काठमाडौं । उपत्यका प्रहरी प्रभाग, फर्पिडका इन्स्पेक्टर गणेश सापकोटा रकम लेनदेन प्रकरणबाट जोगिने उद्देश्यका साथ अचानक केही दिनका लागि बिदा बसेका छन् ।

नेपालबहसले हिरा ख्वै इन्स्पेक्टर सा’प ? शिर्षकमा समाचार प्रकाशित गरेपछि राजधानी छिर्ने र बाहिरिने नाका मध्येको एक फर्पिडमा कार्यरत इन्स्पेक्टर गणेश सापकोटा लामै समयका लागि बिदामा बसेका हुन् ।

सम्भवतः उनी प्रहरीले चेकजाँचका क्रममा बरामद गरेको लाखौं रुपैयाँको हिरा केही नगद उपहार लिएर छाडेकै कारण कारवाहीमा पर्ने डरले सम्भावित कारवाहीबाट जोगिनका लागि बिदा बसेक हुनसक्ने बताइएको छ । आफू र परिवार समेत विरामी परेकाले बिदा बसेको उनले प्रतिक्रिया दिए पनि हिरा भरीयाबाट लिएको रकम पचाउनु नै उनको मुख्य सोच रहेको समाचार स्रोतको भनाई छ ।

अघिल्लो सोमबार सुराकीकै आधारमा फर्पिड प्रहरीले लाखौं रुपैयाँ बराबरको हिरा बरामद गरेको थियो । तर, इन्स्पेक्टर सापकोटाको निर्देशनमा सुटुक्क भरियालाई नै फिर्ता गरेको विषय यतिबेला विवादमा तानिएको छ ।

हिरा कुन व्यापारीको हो ? भरियाले कहाँबाट ल्याएको ? कसलाई दिन खोजिएको थियो ? यस बारेमा प्रहरी स्रोतले केही खुलाउन चाहेन । तर, इन्स्पेक्टर सापकोटा भने सक्कली हिरालाई नक्कली भएकाले छाडिएको मात्र बताइरहेका छैनन्, उल्टै हिरा बोकेको व्यक्तिसँग गाडी भाडा र खाजा खाने रकम समेत नभएकाले आफूहरुले दिएको समेत भन्न भ्याएका छन् । सायद, त्यसो भन्न खोज्नुको कारण आफूहरुले हिरा भरियासँग केही शुभलाम नगरिकनै समान फिर्ता दिएको प्रमाण पेश गर्न खोजेका हुन सक्छन् ।

यसअघि तिब्बतसँग जोडिएको जिल्ला रसुवा नाकामा बस्दा उनी सुन प्रकरणमा विवादमा तानिएका थिए । बिदा सकिएर हाजिर भएपछि इन्स्पेक्टर सापकोटालाई उपत्यका प्रहरी कार्यालयले सोधपुछ गर्ने तयारी भइरहेको बताइएको छ ।