लुम्बिनी विकास बैंकको लफडामा ज्योति समुहको जीत, प्रविणकृष्णले गरे शपथग्रहण

११ साउन, काठमाडौं । सञ्चालक समिति र उच्च व्यवस्थापनमा सधैं लफडा परिरहने लुम्बिनी विकास बैंक लिमिटेडमा ज्योति सममुहबाट प्रतिनिधित्व गर्ने प्रविणकृष्ण श्रेष्ठले शपथग्रहण गरेका छन् । नेपाल राष्ट्र बैंकको रोहबरमा गुण समुह सहमत भएपछि बैंकको सञ्चालक समितिले प्रविणकृष्ण श्रेष्ठलाई सर्वसम्मत अध्यक्षमा चयन गरेको हो ।

बैंक तथा वित्तीय संस्था सम्बन्धी ऐन २०७३ को दफा १२७ (२) बमोजिम नेपाल राष्ट्र बैंकका डेपुटी गभर्नर डा. नीलम ढुङ्गाना तिम्सिनाले आज उनलाई पद तथा गोपनियताको शपथग्रहण गराएकी छन् ।

बैंकको विज्ञप्तिमा उल्लेख भए अनुसार नवनियुक्त अध्यक्ष प्रविणकृष्ण श्रेष्ठले त्रिभुवन विश्वविद्यालयबाट एम.वि.ए.सम्मको शिक्षा हासिल गरि स्ट्याण्र्डर्ड चार्टर्ड बैंक नेपाल लि. (साविक नेपाल ग्रिण्डलेज बैंक लिमिटेड) र माछापुच्छ्रे« बैंक लिमिटेडको उच्च ब्यवस्थापन तहमा रही करीब २ दशक नेपालको बैकिङ क्षेत्रमा सेवा गरेका छन् । विगत ४ बर्षदेखि लुम्बिनी विकास बैंकको सञ्चालक रहदै आएका श्रेष्ठको कुशल नेतृत्वमा लुम्बिनी विकास बैंकले थप प्रगति गर्ने विश्वास लिईएको छ ।

शपथग्रहणको अवसरमा नेपाल राष्ट्र बैंक, बैंक तथा वित्तीय संस्था नियमन विभागका कार्यकारी निर्देशक डा. गुणाकर भट्ट, निर्देशक बुद्धराज शर्मा, लुम्बिनी विकास बैंक लि.का प्रमुख कार्यकारी अधिकृत नरेशसिंह बोहराको उपस्थिति रहेको थियो ।