नयाँ व्यवस्थापनमा सनराइज बैंक यसरी बन्दैछ सबल ! अधिकांश सूचक उत्साहजनक

१२ साउन, काठमाडाैं । युवा र सबल व्यवस्थापनको कारणले गर्दा सनराइज बैंक दिन प्रतिदिन प्रगति पथमा अघि बढेको तथ्याङ्कले देखाउन थालेको छ । कम्पनीले आर्थिक वर्ष ०७८/७९ को वित्तीय प्रतिवेदन सार्वजनिक गर्दै सबैलाई चकित बनाउन सफल भएको छ ।

खुद मुनाफामा करिब ५० प्रतिशतको वृद्धि निकाल्न सफल यस बैंकले तरलता अभावकै बीचमा पनि निक्षेप र कर्जा प्रवाहमा निकै आकर्षक वृद्धि गर्न सफल भएको छ । गत आर्थिक वर्षमा निक्षेप संकलन करिब २४ प्रतिशतले वृद्धि हुँदा कर्जा प्रवाह करिब २० प्रतिशतले वृद्धि हुन् सफल भएको छ ।

बैंकको संचालक समितिको अध्यक्षमा मोतीलाल दूगड छन् भने संचालक समितिका अन्य सदस्यमा बच्छराज तातेड, मालचन्द दूगड, शैलेन्द्र गुरागाईं, शारदा पुडासैनी शर्मा र दीपक नेपाल छन् ।

बैंक उच्च व्यवस्थापनमा सुमन शर्मा प्रमुख कार्यकारी अधिकृत (सीईओ) को रुपमा कार्यरत छन् । युवा तथा सफल बैंकर शर्माले त्रिभुवन विश्वविद्यालयबाट अर्थशास्त्र तथा भौतिकशास्त्रमा मास्टर्स डिग्री हासिल गरिसकेका छन् । त्यस्तै सन् २००५ मा नेदरल्याण्डको मास्ट्रिक्ट स्कूल अफ म्यानेजमेन्टबाट एमबिए हासिल गरेका शर्मा सन् १९९७ मा नेपाल एसबिआई बैंकबाट आफ्नो बैंकिङ यात्रा शुरु गरेका थिए ।

शर्मा ग्लोबल आइएमई बैंक, माछापुच्छ्रे बैंकमा सीईओ, एनएमबि बैंक लगायतमा उच्च व्यवस्थापनमा बसेर काम गरेको अनुभव छ । सनराइज बैंकमा सुमन शर्मा आएपछि बैंकले वित्तीय र व्यवसायिक रुपमा फड्को मारेको यस क्षेत्रका जानकारहरू बताउँछन् । शर्मा आएपछि बैंकभित्रको आन्तरिक व्यवस्थापनपनि निकै सबल भएको चर्चा चल्दै आएको छ। त्यस्तै बैंकको नायव प्रमुख कार्यकारी अधिकृतमा आरती राज्यलक्ष्मी राणा कार्यरत् छन् ।

कम्पनीको आर्थिक वर्ष ०७८/७९ को चौथो त्रैमास र आर्थिक वर्ष ०७७/७८ को चौथो त्रैमासलाई दाँजेर हेर्दा :

खुद मुनाफामा आकर्षक वृद्धि :
आर्थिक वर्ष ०७७/७८ को चौथो त्रैमाससम्ममा १ अर्ब ४४ करोड खुद मुनाफा गर्न सफल यस बैंकले गत आर्थिक वर्ष ०७८/७९ को चौथो त्रैमाससम्म २ अर्ब १५ करोड खुद मुनाफा पुर्याउन सफल भएको छ । खुद मुनाफामा आकर्षक ४८ प्रतिशत माथिको वृद्धि भएको छ।

मुनाफामा आकर्षक सुधारको कारणले गर्दा पनि कम्पनीको प्रतिशेयर आम्दानीमा निकै राम्रो सुधार देखिएको छ । प्रतिशेयर आम्दानी १५ रुपैयाँ २५ पैसाबाट बढेर २१ रुपैयाँ २६ पैसा पुगेको छ ।

प्रमुख आम्दानीको श्रोतमा ३० प्रतिशतको वृद्धि :
बैंकहरुको प्रमुख आम्दानीको श्रोतमा रहेको खुद व्याज आम्दानीमा करिब ३० प्रतिशतको वृद्धि देखिएको छ । आर्थिक वर्ष ०७७/७८ को चौथो त्रैमाससम्ममा ३ अर्ब ५२ करोड खुद व्याज आम्दानी गर्न सफल यस बैंकले गत आर्थिक वर्ष ०७८/७९ को चौथो त्रैमाससम्म ४ अर्ब ५८ करोड खुद व्याज आम्दानी पुर्याउन सफल भएको छ ।

संचालन मुनाफामा २० प्रतिशतको वृद्धि :
संचालन मुनाफामा २० प्रतिशतको वृद्धि हुँदै २ अर्ब ७३ करोड पुगेको छ ।

रिटेण्ड अर्निंग ११८ प्रतिशतले बढ्यो :
बैंकको रिटेण्ड अर्निंग ११८ प्रतिशतले वृद्धि हुँदै १ अर्ब ४६ करोड पुगेको छ भने जगेडा कोष करिब १२ प्रतिशतले वृद्धि हुँदै ५ अर्ब १४ करोड पुगेको छ ।

निक्षेप संकलन र कर्जा प्रवाहमा आकर्षक वृद्धि :
तरलताले काकाकुल भएको बेलामा सनराइज बैंकको निक्षेप संकलन र कर्जा प्रवाहले धेरैजना चकित भएका छन् । एक वर्षको अवधिमा बैंकको निक्षेप संकलन २३ दशमलव ६५ प्रतिशतले वृद्धि हुँदै १ खर्ब ३१ अर्ब पुगेको छ भने कर्जा प्रवाह १९ दशमलव ५६ प्रतिशतले वृद्धि हुँदै १ खर्ब २० अर्ब पुगेको छ।