जब ३० सेकेन्डको दुरीमा प्रहरी पुग्न सकेन, अपराधीलाई कटुवा पेस्तोलसहित स्थानीयबासीहरुले समाते !

◊ दीपक शर्मा

१३ साउन, बर्दिया । बिहीवार समय दिउँसो करिब १२ बजेतिर जिल्ला प्रहरी कार्यालयको मुल गेटतर्फ रहेको हुलाकी राजमार्ग छेउमा अवस्थित यामाहा सोरुममा २ जना मानिसहरु केही कुरा गरिरहेका हुन्छन् । उनीहरु सायद नजिकै रहेको साइकिल चोरी गर्ने योजना बनाउँदै थिए । कुरा गर्दागर्दै साइकिल चोर्न लागे । त्यसै क्रममा स्थानीयबासीहरुले नियन्त्रणमा लिए ।

गुलरिया लगायत आसपासका क्षेत्रमा चोरी डकैंतीका घटना बृद्धि भएका कारण त्रासमा रहेका बर्दियाबासीले ती अपरिचित २ जनाले सोही स्थानबाट साइकिल चोरी गर्दागर्दै पक्राउ गर्छन, एक दुइ झापड पनि लगाउँछन् । त्यसैक्रममा एकजना मानिसको गोजीबाट कटुवा पेस्तोल खस्छ । स्थानीयबासीहरुले नजिकै रहेको प्रहरीलाई खवर गर्छन ।

मुस्किलले प्रहरी कार्यालयदेखि सो घटनास्थलसम्म पुग्न ३० सेकेन्ड भन्दा पनि कम समय लाग्ने स्थानमा १० मिनेटसम्म पनि प्रहरी नआउँदा स्थानीयबासीहरु आफैले ती दुईजना मानिसलाई नियन्त्रणमा लिई प्रहरीलाई बुझाउँछन । पक्राउ परेका दुबै जना भारतीय नागरिक रहेको प्रहरीले पुष्टि गर्छ । उनीहरुको साथबाट २ थान कटुवा पेस्तोल तथा केही नगद बरामद हुन्छ, प्रहरीले अनुसन्धान सुरु गर्छ । तर स्थानीयबासीमा भने त्रास कायमै छ ।

पक्राउ परेका व्यक्तिहरुबाट कुनै किसिमको परिचय पत्र नभेटिएका कारण एकिन गर्न अप्ठेरो भएको जिल्ला प्रहरी कार्यालय बर्दियाका प्रहरी नायव उपरीक्षक एव सूचना अधिकारी सुर्यप्रसाद सुवेदीले बताए । उनका अनुसार पक्राउ परेका २ जना व्यक्तिबाट २ थान कटुवा पेस्तोल, त्यसमा लाग्ने ९ राउन्ड गोली, चक्कु तथा नेपाली रुपैयाँ र केही भारु रुपैयाँ समेत फेला परेको छ ।

प्रहरीको प्रारम्भिक अनुसन्धानमा ती दुवै जनाले दिएको आफनो ठेगानामा पुगी ति व्यक्ति को हुन भन्ने पत्ता लगाउनु पर्ने चुनौति देखिएको छ । प्रहरीले ती दुवैजना भारतीय नागरिकको पहिचान स्पष्ट नभएका कारण गोप्य राखेको छ । प्रहरी स्रोतका अनुसार पक्राउ परेका २ जनाले जे भेटायो, त्यही चोरी तथा लुटपाट गर्ने गरेको पाइएको छ । प्रहरीका अनुसार चोरी डकैति गर्ने समुह अरु पनि हुनसक्ने भन्दै ग्राउन्ड जिरोबाट अनुसन्धान गर्ने बताएको छ । बर्दियामा केही समयदेखि लुटपाट, चोरी, डकैति, बलात्कार लगायतका घटनामा बृद्धि भएको छ ।

साथै बर्दियाको ओराली बजारमा भएकाे प्रहरीको गोली काण्डका कारण सुरक्षामा चुनौति थपिएको छ । प्रहरीको लापरवाही तथा जिल्लाको सुरक्षा निकायको सक्रियता फितलो भएका कारण पनि यस्ता खालका घटनामा बृद्धि भएको स्थानीयबासीहरुको भनाई रहेको छ । प्रहरी स्रोतका अनुसार पक्राउ परेका दुवै जनाले मापसे पनि गरेका थिए । विडम्वना के छ भने प्रहरी कार्यालयको ३० सेकेन्डको दुरीमा रहेको सो स्थानमा प्रहरीलाई पुग्न १० मिनेट लाग्दा स्थानीयबासी अचम्मित छन् ।