अब फारम बिना नै एनआईसी एशिया बैंकमा मेसिनबाट सोझै रकम जम्मा हुने

१६ साउन, काठमाडौं । एनआईसी एशिया बैंकले नगद रकम सोझै मेसिनबाट जम्मा गर्न सकिने सेवाको सुभारम्भ गरेको छ । नयाँ सेवामार्फत अब ग्राहकहरुले बैंकमा गई कुनै फारम बिना खाता नम्बरको आधारमा मेसिनबाट सोझै रकम जम्मा गर्न सक्ने नायव प्रमुख कार्यकारी अधिकृत एवं सूचना अधिकारी अर्जुन खनियाँले जानकारी दिए ।

१००० र ५०० दरका नोटहरु मात्र जम्मा गर्न मिल्ने व्यवस्था रहेकोमा एकजना ग्राहकको खातामा एकपटकमा अधिकतम ९९,५०० गरी दैनिक अधिकतम ९,९९,५०० सम्म नगद जम्मा गर्ने सकिने व्यवस्था गरिएको प्रमुख खनियाँले जानकारी दिए ।

बैंकले यो सेवा हालको लागि न्यूरोड विशालबजार शाखामा विस्तार गरेको हो । निकट भविष्यमा देशका अन्य शाखाहरुमा समेत विस्तार गर्ने योजना बनाइरहेको बैंकले जनाएको छ ।

सोझै मेसिनबाट कसरी जम्मा गर्ने नगद ?

नगद जम्मा गर्नका लागि सेवाग्राहीले उक्त मेसिनमा रकम जम्मा गर्न इच्छाएको खाता नम्बर उल्लेख गरेपछि मोबाइल नम्बरमा OTP प्राप्त हुन्छ । उक्त OTP मेसिनमा उल्लेख गरेर भेरिफाइ भएपछि रकम जम्मा गर्ने प्रक्रिया प्रारम्भ हुनेछ ।

त्यसपश्चात आफूले जम्मा गर्न चाहेको नगद रकम राखेपछि मेसिनले सो रकम खातामा तत्काल जम्मा गरिदिने छ र त्यसको जानकारी एसएसएस तथा रिसिप्ट मार्फत उपलब्ध हुने छ ।

नगद जम्मा गर्नकै लागि भौतिक फारम भरी बैंकको काउन्टरमा लामो समयसम्म बस्नु पर्ने अवस्थाबाट ग्राहकहरुलाई मुक्ति मिल्ने बैंकले विश्वास लिएको छ ।