काभ्रेस्थली घटना : शव हेर्दा हत्यापछि आत्महत्या गरेजस्तो देखिन्छ : मेयर महर्जन

१६ साउन, काठमाडौं । राजधानीको तारकेश्वरमा मृतावस्थामा फेला परेका ४ जना एकै परिवारका रहेको पुष्टि भएको छ । तारकेश्वर नगरपालिका–२ पदमसालमा सोमबार बिहान एकै परिवारका चार जनाको शव विभत्स अवस्थामा भेटिएको हाे ।

जिल्ला प्रहरी परिसर काठमाडौंले मृतक एकै परिवारका भएको पुष्टि गरेको हो । मृतकमा श्रीमान–श्रीमती र दुई छोराछोरी रहेका छन् ।

घटनास्थलमा पुगेर फर्केका तारकेश्वर नगरपालिकाका मेयर कृष्णहरि महर्जनले नेपालबहससँग कुराकानीका क्रममा भने :- “शव हेर्दा हत्यापछि आत्महत्या गरेजस्तो देखिन्छ। तर, अहिले नै निष्कर्ष निकालिहाल्न सकिने अवस्था छैन।”

घरका सबै झ्याल–ढोका बन्द रहेको अवस्थामा शव फेला परेकाले परिवारकै सदस्यबाट घटना घटेको जस्तो देखिने उनले बताए। दिनेश पाण्डे, उनकी श्रीमती सुनिता काप्री पाण्डे, ११ वर्षका छोरा आशिक र छोरी आशिका मृत भेटिएका हुन् ।

घटनास्थलमा संलग्न प्रहरीका अनुसार दिनेशलाई झुन्डिएको अवस्थामा मृत फेला पारिएको हो । भित्रबाट चुकुल लगाएर पहिला श्रीमती, छोरा र छोरीको हत्या गरेर दिनेशले आत्महत्या गरेको प्रहरीले प्रारम्भिक अनुसन्धानबाट पत्ता लागेको जनाएको छ ।

४१ वर्षीया पाण्डे १० वर्ष कुवेतमा वैदेशिक रोजगारीको सिलसिलामा बसेर फर्केका थिए । दिनेशकी ३९ वर्षीया श्रीमती सुनीता पाण्डे घर नजिकै पसल चलाएर बसेकी थिइन् । प्रहरीका अुनसार उनीहरुको झैझगडा भइरहने र केही समयअघि दुईपटक बालाजु प्रहरी वृत्तमा मिलापत्र गरेर छाडिएको थियो ।

 बिहान अबेरसम्म पनि घरमा सुनसान भएपछि स्थानीयले ढोका फोरेर हेर्दा उनीहरु मृत फेला परेको खबर प्रहरीलाई दिएका थिए । प्रहरीका अनुसार अहिले घटनास्थलबाट मुचुल्का उठाउने काम भइरहको छ।