नेपाल बैंकका गुलरिया शाखा अधिकृत बेपत्ता ! केन्द्रीय प्रवत्ता अधिकारी भन्छन् : बैंकिङ कसुर गरेको देखिन्छ

♦ दीपक शर्मा

२२ साउन, बर्दिया । ग्राहकको आईपीएस प्रयोग गरी आफन्तकोमा रकमान्तर गरेको आरोपमा सम्पर्कबिहीन भएका नेपाल बैंक लिमिटेड गुलरिया शाखाका प्रमुख धवेन्द्र न्यौपानेको खोजी कार्य जारी रहेको छ ।

न्यौपाने करिब ३ महिना अगाडि मात्रै बर्दियाको गुलरियामा रहेको नेपाल बैंक लिमिटेड शाखामा सरुवा भएर आउनु भएको थियो, सुर्खेतबाट सरुवा भएर आएका न्यौपाने गएको बुधवारदेखि कार्यालयको सम्पर्कबाट बाहिरिएका हुन्।

नेपाल बैंक लिमिटेडका केन्द्रीय सूचना अधिकारी प्रकाशकुमार अधिकारीले नेपालबहस डटकमसँग कुरा गर्दै भने  “बैंकिङको कसुर गरेको देखिएको छ तर के कति रकम हो वा कसको हो भन्ने बारेमा खुल्न सकिरहेको छैन ।” अनुसन्धानका लागी २ जना कर्मचारी गुलरिया पठाइसकेको हुँदा त्यो रिपोर्ट आएपछि मात्रै कति रकम हिनामिना भएको हो, थाहा हुने उनले बताए।

साथै उनले सुर्खेतबाट सरुवा भइ गुलरिया आएका न्यौपानेलाई बुधबार नै सुर्खेतको शाखामा केही गडबडी देखिएपछि सुर्खेत शाखाले सम्पर्क गर्दा कुरा हुँदै गर्दा मोवाइल अफ भएको र आफुहरुले पनि सम्पर्क गर्न खोज्दा सम्पर्क नभएको हुँदा खोजी कार्यका लागी प्रहरीलाई आग्रह पनि गरिएको बताए ।

सुर्खेत र गुलरियामा प्रारम्भिक चरणमा केही रकम हिनामिना भएको देखिएपनि आन्तरिक रुपमा अनुसन्धान जारी रहेको हुँदा सुर्खेत र गुलरियामा के भएको रहेछ थाहा हुने बताए । उनले भने के कति रकम हिनामिना भएको छ ? उता परिवार स्रोतका अनुसार करिब एक हप्ता देखि नै सम्पर्कमा नरहेका न्यौपानेलाई शुक्रबार आफन्तले खोजतलास गरी पाँउ भन्दै जिल्ला प्रहरी कार्यालय बर्दियामा निवेदन दिएको प्रहरी नायव उपरिक्षक सुर्यप्रकाश सुवेदीले नेपालबहस डटकमलाई बताए ।