नियतमै खोट देखिए दण्डसहित कारबाही : शहरी विकास मन्त्री चौधरी

२२ साउन, काठमाडौं । शहरी विकास मन्त्री मेटमणि चौधरीले आफू कर्मचारी चलाउने पक्षमा नरहेको तर नियतमै खोट देखिए दण्डसहित कारबाही गर्ने बताएका छन् ।

शहरी विकास मन्त्रालयको आ. व. ०७८/७९को वार्षिक प्रगति समिक्षा तथा आ. व. ०७९/८० को कार्यक्रम कार्यान्वयन सम्बन्धि कार्यक्रममा आयोजित ३ दिने कार्यक्रममा समापन मन्तव्य राख्दै मन्त्री चौधरीले भने, ‘मन्त्री भएको ३८ दिनभयो । मेरो मूल्याङ्कन तपाईहरुले गर्नुभएकै होला । म कसैको चित्त दुखाउन चाहन्नँ । त्यसकारण म कर्मचारी चलाउने पक्षमा छैन । तर नियतमै खोट देखिए कारबाही मात्र होइन दण्डसहित कारबाही गर्नुपर्ने हुनसक्छ ।’

मन्त्रालयका सचिव, सहसचिव, महानिर्देशक,आयोजनाप्रमुख, विभागीय प्रमूखसहित देशभरिबाट जम्मा भएका इन्जिनियर तथा कर्मचारीहरुलाई निर्देशनात्मक मन्तव्य राख्दै मन्त्री चौधरीले दोहोर्याए, ‘हामी सबै सिस्टमबाट चल्नुपर्छ । सिस्टम क्रयाक गरेर देश बन्दैन । इमानदारीपूर्वक सिस्टममा रहेर काम गर्यौ भने देश बन्न समय पनि लाग्दैन ।

नेता भए भन्दैमा जम्मै कुरा आइहाल्ने भन्ने नहुने बताएका मन्त्री चौधरीले आफ्ना कामबारे सुझाव दिन समेत आग्रह गरेका थिए । उनले बेरुजु घटाउने, रुग्न आयोजनाहरुलाई पुरा गर्ने, बीचबीचमा आयोजनाका नाम परिवर्तन गर्ने जस्ता कुराहरु मूख्यचुनौती रहेको धारणा राखेका थिए ।

शहरी विभाग तथा भवन निर्माण विभाग अन्तर्गत विभिन्न २१ आयोजनामध्येबाट ४ जना उत्कृष्ट आयोजना प्रमुखलाई मन्त्री चौधरीले पुरस्कृत गरेका छन् । वित्तीय तथा भौतिक प्रगति, बेरुजु फछ्र्यौट, रुग्न आयोजना घटाउने पहल, कार्यक्षमता जस्ता सुचाङ्कका आधारमा शहरी विकास तथा भवन निर्माण विभागका उपमहानिर्देशकत्रय दीलिप भण्डारी, चक्रवर्ती कण्ठ र सुरेन्द्रमान श्रेष्ठको मुल्याङ्कन टोलीको सिफारिसमा पुरस्कृत गरिएको थियो ।

पुरस्कृत हुनेहरुमा सघन शहरी तथा भवन निर्माण आयोजना कार्यालय चितवनका प्रमुख प्रकाश अर्याल, रामेछापका आयोजना प्रमुख सुरेश वाग्ले, संघीय आयोजना कार्यान्वयन इकाइ कैलालीका प्रवीण शाह र धनुषाका प्रदीप खनाल रहेका छन् । शहरी विकास मन्त्रालय अन्तर्गत रहेको शहरी विभाग तथा भवन निर्माण विभागले आगामी आर्थिक वर्षको कार्यक्रम कार्यान्वयन सम्बन्धि २४ बुँदे घोषणापत्र समेत जारी गरेको छ ।