बीरगञ्ज महानगर अवैंधानिक अभिभावक संघको चंगुलमा फसेको प्याब्सनको आरोप, शिक्षण शुल्क नउठाए बिद्यालय नै बन्द हुने चेतावनी

२२ साउन, बीरगञ्ज । प्याब्सन बीरगञ्जले महानगरले संस्थागत विद्यालयहरुका संचालक लगायत अन्य सरोकारवालासँग कुनै छलफल नै नगरी बक्यौता शिक्षण शुल्क नउठाउनु भन्ने मनसायले अनाधिकारिक स्रोत facebook बाट जारी भएको सूचनाप्रति गम्भीर ध्यानाकर्षण भएको जनाएको छ ।

एक विज्ञप्ति जारी गर्दै उक्त सूचना अनुसार बीरगन्ज महानगरपालिकामा भएको सर्वपक्षीय छलफलमा बक्यौता शिक्षण शुल्क उठाउनै नपाउने भन्ने कुनै सहमति नभएको प्रष्ट पार्न चाहएको विज्ञप्तिमार्फत जनाएको छ । यद्यपि, शुल्ककै कारणले बिद्यार्थीहरुको परीक्षा छुट्नु वा छुटाउनु हुन्न भन्ने विषयमा प्याब्सन आबद्ध सबै सदस्य बिद्यालयहरु प्रतिबद्ध रहेको जनाइएको छ ।

अनाधिकारिक स्रोतबाट जारी भएको सूचनाले गर्दा व्यक्तिगत स्वार्थ पूरा गर्न गठित समूह अर्थात अवैंधानिक अभिभावक संघर्ष समितिले त्यसलाई गरी खाने भाँडो भएको छ । उक्त समूहले त्यही सूचनालाई आधार बनाएर सम्पूर्ण अभिभावकलाई दिग्भ्रमित पार्दा बिद्यालय र अभिभावकबीच फाँटो ल्याउने कार्य भएको छ । मिति २०७९ श्रावण १८ गते बुधबार हाम्रो एक सदस्य विद्यालयले शुल्कतिरेर प्रवेशपत्र लिन आग्रह गर्दा अभिभावकहरु बिद्यालयको सम्पर्कमा नआई उक्त समूहको सम्पर्कमा गएको बुझिन्छ । उक्त समूहको दबाबमा महानगरले विद्यालय र बिद्यालय संचालकलाई अप्रिय शब्दहरु बोलेको बिषयमा समेत हाम्रो ध्यानाकर्षण भएको विज्ञप्तिमा जनाइएको छ ।

अधिकांश अभिभावकहरुले मासिक रुपमा शिक्षण शुल्क नबुझाई परीक्षाको बेला तिर्ने बुझाउने गरेकोमा उक्त सूचनाले परीक्षाको बेला पनि बक्यौता शुल्क उठ्न गाह्रो भएको छ । बिद्यालयहरुले चालु महिनाको नभएर गत शैक्षिक सत्र र विगतकै महिनाहरुको बक्यौता माग गर्दा समेत हाम्रा अभिभावक दिग्भ्रमित भएर शुल्क नबुझाई दिदाँ विद्यालयहरुले दैनिक संचालन खर्च, मासिक तलब, घर भाडा, डिजल खर्चहरु समेत धान्न अप्ठ्यारो भएको जारी विज्ञप्तिमा उल्लेख छ ।

जसले गर्दा संस्थागत विद्यालयहरुमा आश्रित महानगरको करिब ४ हजार शिक्षक कर्मचारीहरुलाई १ देखि ३ देखि महिनासम्मको तलब सुबिधा समेत दिन सकिएको छैन । संस्थागत विद्यालयहरुको सम्पूर्ण बजेट शुल्क नै हो र शुल्क नै नउठाउनु भन्ने मनसायले जारी सूचनाले सिर्जित समस्याको जिम्मेवारी कसले लिने भन्ने प्रश्न खडा भएको छ ?

के महानगरपालिका हाम्रो अभिभावक होइन ? हाम्रा समस्याहरु सहजीकरण गर्नमा हाम्रो अभिभावकीय निकाय किन चुक्यो ? के यसरी नै बीरगन्ज शैक्षिक हब बन्छ ? हाम्रो प्रश्न छ । महानगरको साथ साथै राज्यभित्रको शैक्षिक गुणस्तर कायम राख्य योगदा नदिदैं आएका हामी संस्थागत बिद्यालय र संस्थापकहरुलाई अमर्यादित तरिकाले आतंकित बनाउने कार्य अभिभावक निकाय र अभिभावकबाट भएकोमा घोर दुःख प्रकट गरेको विज्ञप्तिमा उल्लेख छ ।

कुनै एक अमुक व्यक्ति र व्यक्तिगत स्वार्थ पूरा गर्न गठित समूहकै मात्र कुरा सुनेर सत्य तथ्य नै नबुझीकन निर्देशन दिएर कार्यवाही गर्ने कार्य कसैबाट पनि हुनु हुँदैंन भन्ने हाम्रो माग छ । साथै, चुस्त दुरुस्त सेवाप्रवाह दिएर शैक्षिक गुणस्तर कायम राखेर अभिभावकको विश्वास कमाएका हामीलाई अनुकुल अवस्थामा समेत विद्यालय बन्द गर्नु भन्ने सूचना निकालेर निर्णय लाद्नु पनि यथोचित नभएको प्याब्सन बीरगंजनले जनाएको छ ।

विज्ञप्तिमा भनिएको छ, “अभिभावक निकायले सम्बन्धित सरोकारवालासँग विस्तृत छलफल नै नगरी कुनै पनि निर्णय नहोस् भन्ने विषयहरुमा हामी सचेत गराउन चाहन्छौं । अन्यथा, त्यस प्रकारको निर्णयबाट बाध्यात्मक परिस्थितिहरु उत्पन्न हुनपुगेमा त्यसको जिम्मेवार हामी हुने छैनौं ।”