सिट बाँडफाँड न्यायोचित हुनुपर्ने देउवालाई झलनाथको सुझाव

२४ साउन काठमाडौं । प्रतिनिधि सभा र प्रदेश सभा सिट बाँडफाँटका लागि सत्तारुढ पाँच दलीय गठबन्धनले ११ सदस्यीय कार्यदल बनाएर गृहकार्य सुरु गरिरहेका बेला सत्तारुढ दल नेकपा एकीकृत समाजवादीका नेता झलनाथ खनालले प्रधानमन्त्री शेरबहादुर देउवा समक्ष २०७४ र स्थानिय चुनवाका आधारमा सिट बाँडफाँड गर्ने प्रस्ताव राखेका छन् ।

नेता झलनाथ खनालले प्रतिनिधि सभा र प्रदेश सभा सदस्य निर्वाचनका लागि गठबन्धनमा सिट बाँडफाँट गर्दा मुख्यगरी दुईवटा आधारमा गर्नुपर्ने प्रस्ताव गरेका छन् । मंगलबार बिहान प्रधानमन्त्री तथा कांग्रेस सभापति शेरबहादुर देउवालाई भेटेर नेता खनालले सिट बाँडफाँट न्यायोचित ढंगले हुनुपर्ने भन्दै दुईवटा आधार अघि सारेका हुन् ।

पुर्व प्रधानमन्त्री समेत रहनु भएका खनालले सम्मानजनक ढंगले सिट बाँडफाँड नभए गठबन्धनको औचित्य नहुने समेत बताए । साथै उनले प्रधानमन्त्रीसँगको भेटमा कार्यदललाई चाँडो काम गर्न लगाएर सिट तालमेलको मोडालिटीबारे प्रस्ट हुनुपर्ने बताए।

गठबनधनले सिट बाँडफाँटका लागि कार्यदल बनाएको छ । गत साउन २० गते बसेको गठबन्धनको बैठकले ११ सदस्यीय कार्यदल गठन गरेको थियो । जसमा काँग्रेसका पुर्व महामन्त्री कृष्ण सिटौला, महामन्त्री गगनकुमार थापा र ज्ञानेन्द्रबहादुर कार्की , माओवादी केन्द्रबाट देव गुरुङ र वर्षमान पुन रहेका छन् ।

जनता समाजवादी पार्टीबाट रामसहाय यादव र रकम चेम्जोङ तथा राष्ट्रिय जनमोर्चाबाट दुर्गा पौडेल र हिमलाल पुरी छन् भने नेकपा एकीकृत समाजवादीबाट उपाध्यक्ष प्रमेश हमाल र महासचिव बेदुराम भुसाल रहेका छन् ।