जर्मनीमा बच्चामा पनि भेटियो मङ्कीपक्सको संक्रमण

२५ साउन, एजेन्सी ।  जर्मनीमा बच्चामा पनि मङ्कीपक्सको संक्रमण भेटिएको बताइएको छ । यहाँका चार बर्षीया एक बालिकामा यो संक्रमण पाइएको जर्मनीको रोबर्ट कोच इन्स्टिच्युटले सो जानकारी दिएको हो ।

उक्त इन्स्टिच्युटले दिएको जानकारीअनुसार यहाँ १५ र १७ वर्षका दुई जना किशोर संक्रमित रहेका र उनीहरुसँगै बस्दै आएकी यी बालिकामा पनि सो संक्रमण भेटिएको उक्त इन्स्टिच्युटले मंगलबार जनाएको छ ।

जर्मनीमा गएको मे महिनादेखि मङ्कीपक्सको संक्रमण देखिएको हो । यहाँ अहिलेसम्म दुई हजार नौसय भन्दा बढीमा यो संक्रमण भेटिइसकेको छ । तर बच्चामा भने यो पहिलो पटक पाइएको बताइएको छ ।

अहिले विश्वका दर्जनौँ देशमा यो संक्रमण भेटिएको छ र ती देशमध्ये सबैभन्दा बढी अमेरिकामा नै यसको संक्रमण बढ्दो छ । पछिल्लो तथ्यांकअनुसार अमेरिकामा मात्र मङ्कीपक्सका आठ हजार नौसय भन्दा बढीमा यो संक्रमण भेटिएको पाइएको छ ।