अवैध मदिरा भट्टीमा प्रहरीको छापा : करिब १ लाख लिटर घरेलु मदिरा र १७ वटा उत्पादन भट्टी नष्ट

२५ साउन,  बीरगञ्ज । बाराको महागढीमाई नगरपालिकामा प्रहरीले छापामारी गरी १७ वटा अबैध घरेलु मदिरा भट्टी भत्काउनुका साथै ८० हजार लिटरभन्दा बढी मदिरा नष्ट गरेको छ ।

जिल्ला प्रहरी कार्यालय बाराका प्रहरी उपरीक्षक होबिन्द्र बोगटीको निर्देशनमा गएको प्रहरीको टोलीले बुधबार दिनभर महागढीमाई नगरपालिकाको वडा नम्बर ३ र १० मा छापामारी गरी अवैध घरेलु मदिरा भट्टी भत्काउनुका साथै मदिरा बनाउन प्रयोग हुने कच्चा पदार्थ, भाडा र तयारी मदिरा नष्ट गरेको हो ।

प्रहरीले ८० हजार लिटर मदिरा बनाउन प्रयोग हुने कच्चा पदार्थ र १० हजार लिटर बजार पठाउन ठिक्क पारिएको तयारी मदिरा जफत गरी नष्ट गरेको प्रहरी उपरीक्षक बोगटीले बताए ।

जिल्लामा अपराधिक गतिविधि, घरेलु हिंसा न्यूनिकरण गर्न अवैध घरेलु मदिरा उत्पादन भट्टी बन्द गर्नुपर्ने आवश्यकता देखिएकाले प्रहरीले विशेष टोली बनाएरै बुधबार महागढीमाईको २ वटा गाउँमा छापामारिएको उनले बताए । अवैध घरेलु मदिरा भट्टि नष्ट गर्न जिल्ला प्रहरी कार्यालयबाट ४५ जनाको प्रहरी टोली खटिएको थियो ।

छापामारीका क्रममा पक्की घरभित्र अण्डरग्राउण्ट टंकी निर्माण गरेर मदिरा तथा मदिरा बनाउन प्रयोग हुने कच्चापदार्थ भण्डारण गर्ने गरेको भेटीएको पनि प्रहरीले जनाएको छ । यसका साथै मदिरा बनाउन अस्वस्थकर सामग्री प्रयोग गर्नुका साथै सडेगलेका वस्तु पनि हाल्ने गरेको भेटिएको प्रहरीले जनाएको छ ।

यहाँ उत्पादित घरेलु मदिरा कलैया बजारका साथै वीरगञ्जसम्म पुग्ने गरेको थियो । ‘यो बारा प्रहरीको ठूलो सफलता हो,’ प्रहरी उपरीक्षक बोगटी भन्छन्, ‘आउँदा दिनमा फेरि उत्पादन नगरुन भनेर हाम्रो निरन्तर निगरानी रहन्छ ।’