बिहानैदेखि चार प्रदेशमा वर्षा, कर्णाली र बागमतीमा भारी वर्षा हुने

२६ साउन, काठमाडाैं। अहिले देशका चार वटा प्रदेशमा बिहानैदेखि हल्का वर्षा भइरहेको छ। लुम्बिनी, गण्डकी, कर्णाली र सुदूरपश्चिम प्रदेशका पहाडी भू-भागका स्थानहरुमा मेघगर्जन चट्याङसहित हल्कादेखि मध्यम वर्षा भइरहेको जल तथा मौसम विज्ञान विभागले जनाएको छ।

बागमती र कर्णाली प्रदेशका एक दुई स्थानमा भारी वर्षाको सम्भावना रहेको छ। हाल प्रदेश नम्बर १, मधेस प्रदेश र बागमती प्रदेशमा आंशिक बदली तथा बाँकी प्रदेशका भू-भागहरुमा सामान्य देखि पूर्ण बदली छ।

आज बिहीबार दिउँसो देशभर आंशिकदेखि सामान्य बदली रहनेछ। राति देशका पहाडी भू-भागमा आंशिकदेखि सामान्य बदली र बाँकी भू-भागमा आंशिक बदली रहनेछ।

प्रदेश १, बागमती र गण्डकी प्रदेशको थोरै स्थानहरूमा र बाँकी भू भागका एक दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। देशका पहाडी भू-भागका केही र बाँकी भू भागका थोरै स्थानहरूमा मेघ-गर्जन चट्याङसहित हल्कादेखि मध्यम वर्षाको सम्भावना छ।