ठगीको आरोपमा बर्दियाकी चेली कैलालीमा पक्राउ

२६ साउन, कैलाली । कैलालीको टीकापुर नगरपालिकाका विभिन्न गाउँमा पैसा असुलेको आरोपमा बर्दिया राजापुर नगरपालिका–१० खैरीचन्दनपुर निवासी २४ वर्षीया कविता थारुलाई पक्राउ गरिएको इलाका प्रहरी कार्यालय टीकापुरले जनाएको छ ।

उनीमाथि विद्यार्थीलाई पोशाक, कापीकलम, झोला लगायतका सामान उपलब्ध गराउने आश्वासन दिई विद्यार्थीका अभिभावकबाट ५ सय असुलेको आरोप छ ।

गुड नेवर्स नामक संस्थामा काम गर्ने बताउने उनले पदमपुरमा ७७ जना, वनगाउँमा ८७ जना, फाँटामा ६६ जना र झुँगामा ७४ जनाबाट जनही ५०० का दरले १ लाख ५२ हजार रुपैयाँ संकलन गरेकी खुल्न आएको छ ।

प्रहरीले वैशाख र जेठ महिनामा समेत उनले धेरै अभिभावकबाट पैसा संकलन गरेको हुनसक्ने बताएको छ । ठगी गरेको भन्दै ४ जनाले उजुरी दिएको आधारमा थारुलाई पक्राउ गरिएको इलाका प्रहरी कार्यालय टीकापुरका प्रहरी नायब उपरीक्षक हेमबहादुर शाहीले जानकारी दिए।