सहयात्री कोअपरेटिभ १२ औं बर्षमा प्रवेश, नगरप्रमुख रेग्मीलाई ५ हजार झोला हस्तान्तरण

२९ सााउन, स्याङ्जा । सहयात्री कोअपरेटिभ स्याङ्जाले संस्थाको ११ औं बार्षिकउत्सवको अवसरमा सपिङ् ब्याग वितरण गरेको छ । “सफा पुतलीबजार राख्न, हाम्रो सानो प्रयत्न” नारा अंकित झोला पुतलीबजार नगरपालिका प्रमुख तुलसीराम रेग्मीलाई हस्तान्तरण गरि शुभारम्भ गरिएको हो ।

प्लास्टिकजन्य झोला विस्थापन गर्न सहयोग पुर्याउने उद्देश्यले सहकारीले सो झोला वितरण गरेको हो । झोला ग्रहण गर्दै नगर प्रमुख रेग्मीले सहयात्रीले स्थापनाकालदेखि नै विभिन्न रचनात्मक काम गर्दै आएको स्मरण गर्दै बार्षिकउत्सवको अवसरमा स्वच्छ र सफा पुतलीबजार निर्माणमा हातेमालो गरेकोमा आभार ब्यक्त गर्दै प्लास्टिकमुक्त पुतलीबजार बनाउन सबैले सहकार्य र सहयोग गरिदिन आग्रह गरेका छन् ।

कार्यक्रममा वातावरण तथा सरसफाई शाखा प्रमुख धनप्रसाद कोइराला, सहकारी शाखा प्रमुख बिष्णु ढकाल, प्रेम थापा, सबईन्जिनियर अरुण पौडेल, वडा नं -३ अध्यक्ष राजेन्द्रप्रसाद श्रेष्ठ लगायतले स्वच्छ पुतलीबजार निर्माणका लागि एउटा उदाहरणीय अभियान भएकाले नगरबासीले व्यवसाय र किनमेलमा प्लाष्टिक झोलाको प्रयोग नगरी सो झोलाको प्रयोग गरिदिन आग्रहकासाथ शुभकामना प्रदान गरेका थिए ।

सहकारीले पहिलो चरणमा नगरभित्रका ५००० (पाँच हजार) घरधुरीमा सो झोला वितरण गर्ने र पुतलीबजार नगरपालिकासँग समन्वय गरी नगरभित्रका १२००० (बाह्र हजार) घरधुरीमा पुर्याउने लक्ष्य रहेको संस्थाका कोषाध्यक्ष तथा कार्यक्रम संयोजक श्रीबहादुर गुरुङ्ले जानकारी दिए। २०६९ सालमा स्थापित सहकारीमा २०२० शेयर सदस्य रहेका छन । सहकारीका अध्यक्ष अज्योद्दा शाक्यको अध्यक्षतामा सम्पन्न कार्यक्रमको संचालन सचिव मनोज मल्लले गरेका थिए ।

दृष्टिबिहीनहरुका लागि सेतो छडि वितरण गरि स्थापना गरिएको यस संस्थाले सामाजिक उत्तदायित्व अन्तर्गत हालसम्म तपशिलका कार्यक्रमहरु संचालन गरिसकेको छ ।

♦ चम्पागिरि आश्रममा आर्थिक सहयोग
♦जिल्ला अस्पताल स्याङ्जामा फलफुल वितरण, पानीका जार वितरण, दिशानिर्देश बोर्ड सहयोग
♦२०७२ सालको भुकम्पमा गोर्खाको बारपाक लगायत पुतलीबजारका विभिन्न वडाहरुमा भुकम्प पीडितहरुका लागि कपडा, खाद्यान्न तथा जस्ता सहयोग
♦रामनदी बृद्दाश्रममा आर्थिक तथा खाद्यान्न सहयोग
♦अमोर सेवा नेपाल (बालगृहमा) खाद्यान्न सहयोग
♦बाल बचतकर्ताहरुका लागि निशुल्क झोला वितरण
♦निशुल्क दन्त तथा स्वास्थ्य शिविर
♦कोभिड (१९ पहिलो संक्रमणको बेलामा पुतलीबजार नगरपालिकामार्फत खाद्यान्न वितरण
♦कोभिड(१९ दोस्रो संक्रमणमा सर्वसाधारणमा निशुल्क मास्क वितरण
♦सफा पुतलीबजारका लागि निशुल्क बजार झोला वितरण