जुम्ल्याहा शिशु र आमाको निधन भएपछि भेरी अस्पतालमाथि प्रश्न खडा

३१ साउन, बाँके । भेरी अस्पतालमा सुत्केरी हुन पुगेकी महिला र शिशुको मृत्यु भएपछि परिवार र आफन्तले अस्पतालमा तनाव सिर्जना गरेका छन् ।

अस्पतालका अनुसार नेपालगन्ज उपमहानगरपालिका वडा नम्बर–७ निवासी २२ वर्षीया नाधिया खातुनको मृत्यु भएको हो । सुत्केरी ब्यथाले च्यापेपछि उनी भेरी अस्पतालमा पुगेकी थिइन् । चिकित्सकले महिलाको पेटमा शल्यक्रिया गरेर जुम्ल्याहा बच्चा निकालेका थिए । शल्यक्रिया गरेको केहीबेरमै सोमबार दिउँसो करिब ३ बजेतिर आमा र दुबै बच्चाको मृत्यु भएको आफन्तले बताएका छन ।

चिकित्सकको लापरबाहीले सुत्केरी आमा र शिशुको मृत्यु भएको भन्दै आफन्तले सोमबार बेलुकी तनाव सिर्जना गरेका हुन् । परिवार र आफन्तले केहीबेर तनाव सिर्जना गरेपनि अहिले शान्त रहेको प्रहरीले जनाएको छ ।

यसअघि पनि भेरी अस्पतालमा सुत्केरी महिला र शिशुको मृत्यु हुने गरेको छ । महिला र शिशुको मृत्यु हुने गरेपछि भेरी अस्पतालको वर्थिङ सेन्टर पटक–पटक विवादमा तानिने गरेको हो । घटनाको विषयमा अस्पतालले केही बोलेको छैन ।