सुधार केन्द्रमा शंकास्पद मृत्यु

१ भदौ,बाँके । नेपालगन्जमा रहेको आरम्भ पुर्नस्थापना सुधार केन्द्रमा रहेका एक ब्यक्तीको शंकास्पद मृत्यु भएको बाँके प्रहरीले जनाएको छ ।

जिल्ला प्रहरी कार्यालय बाँकेका प्रवक्ता एवम् प्रहरी नायव उपरिक्षक रामप्रसाद घर्तीमगरले दिएको जानकारी अनुसार नेपालगन्ज उपमहानगरपालिका वडा नम्बर १० मा रहेको आरम्भ पुर्नस्थापना सुधार केन्द्रमा बर्दियाको बढैयाताल गाउँपालिका वडा नम्बर ८ का ५२ वर्षीय रमेश अधिकारीको मृत्यु भएको जानकारी दिए ।

सुधार केन्द्रमा उनलाई असहज भएपछि अस्पताल पुर्याउँदै गर्दा बुधबार बिहान बाटोमै मृत्यु भएको हो । प्रहरीका अनुसार उनी एक हप्ता अगाडी मात्र उक्त सुधार केन्द्रमा आएका थिए । अधिकारीको मृत्युका विषयमा आवश्यक अनुसन्धान सुरु गरिएको डिएसपी घर्तीले बताए ।