बजेटमा नतोकिएका नयाँ कार्यक्रम सञ्चालनमा रोक

४ भदौ, काठमाडौं । निर्वाचन आयोगले निर्वाचन क्षेत्र पूर्वाधार विकास कार्यक्रम वा सोही प्रकृतिका योजना र बजेटमा नतोकिएका नयाँ कार्यक्रम सञ्चालन नगर्न र नगराउन तीनै तहका सरकारलाई निर्देशन दिएको छ ।

आयोगले नेपाल सरकार, सात वटै प्रदेश सरकार र ७५३ स्थानीय तहलाई यसप्रकारको निर्देशन दिएको छ । प्रदेश १ ले निर्वाचन क्षेत्र विशेष कार्यक्रम र पूर्वाधार कार्यक्रमका लागि बजेट विनियोजन गरेको थियो । प्रदेशको उक्त कदमपछि आयोग सक्रिय भएको हो।

योजना र बजेटमा नतोकिएको नयाँ कार्यक्रम सञ्चालन गर्दा मतदातालाई प्रभावित पार्ने एवं निर्वाचनको स्वच्छता र निष्पक्षतामा प्रभाव पार्न सक्ने देखिएकाले आयोगले त्यस्ता कार्यक्रम कार्यान्वयन नगर्न तीनै तहलाई निर्देशन दिएको हो ।

विपद् व्यवस्थापनसम्बन्धी कार्य, मानवीय सहायता प्रदान र स्वास्थ्य महामारी रोकथाम गर्न आवश्यक कार्य बाहेक कुनै पनि प्रकारका नयाँ आयोजना तथा कार्यक्रम सञ्चालन तथा कार्यान्वयन नगर्न तीनै तहलाई निर्देशन दिइएको आयोगका प्रवक्ता शालिग्राम शर्मा पौडेलले जानकारी दिए ।