स्याङ्जामा भेटिए मिटरब्याजी पीडित दुई जना, के होला त कारबाही ?

६ भदौ, स्याङ्जा । निरक्षर, गरिब र आर्थिकरुपले अफठ्यारोमा रहेका व्यक्तिहरुलाई शोषण गरेको खबर बाहिर आएपछि गृह मन्त्रालयले कार्यदल गठन गरी उजुरी दिन पाईने व्यवस्था गरेको छ । मिटरब्याजीका कारण धेरै नागरिकको घरखेत लिलामदेखी विचल्ली परेको बिषयमा देशका सबै जिल्ला प्रशासनमा उजुरी दिन पाईने व्यवस्था गृह मन्त्रालयले शुरु गरेको छ ।

सोही मुताविक स्याङ्जामा पनि मिटरब्याजीबिरुद्ध जिल्ला प्रशासनमा उजुरी दर्ता भएको छ । स्याङ्जामा दुई जनाले मिटरब्याजीबाट आफु अफठ्यारो परेको भन्दै जिल्ला प्रशासन कार्यालयमा उजुरी दिएको प्रमुख जिल्ला अधिकारी राजुप्रसाद पौडेलले जानकारी दिए ।

अहिलेसम्म प्रशासनमा दुईवटा उजुरी आएका छन् प्रजिअ पौडेलले भने,‘गृह मन्त्रालयको निर्देशन अनुसार उजुरी गृह मन्त्रालयमा नै पठाईसकेका छौं ।’ के कसरी अनुसन्धान हुन्छ त्यो पछि सार्वजनिक हुनेछ उनले भने । अहिलेसम्म हामीलाई उजुरी बुझ्ने र मन्त्रालय पठाउने निर्देशन भएकाले सोही बमोजिम उजुरी गृहमा पठाएको बताए । छानविनको अधिकार हामीसँग नभएको र पछि मन्त्रालयले प्रशासनमै पठाएमा छानविन गर्न भनेमा जिल्लाबाटै हुने प्रजिअको भनाई छ ।

दुबै उजुरी फेदीखोला गाँउपालिकाबाट आएको प्रशासनले जानकारी दिएको छ । उजुरीकर्ता र मिटरब्याजीमा अपराध गर्ने (पीडित र पीडक) व्यक्तिको नाम भने गोप्य राखिएको छ । दुई उजुरी प्रशासनमा परेपछि भने जिल्लामा यस्तो अपराध धेरै हुन सक्ने आशंका प्रशासनले लगाएको छ ।

गोप्य रुपले त्यस्ता अपराधीक क्रियाकलाहरु घटेका छन् भने उजुरी दिन प्रशासनले आग्रह समेत गरेको छ । लेनदेन गर्नु अपराध नभएपनि लेनदेनबाट कमाउने उद्देश्य राख्नु गैह्रकानुनी हुने बताइएको छ ।

मिटरब्याजीबाट आर्थिक अपराध गर्नेहरुलाई कानुनी दायरामा ल्याउन सरकारले साउन २७ गते गृहमन्त्री स्तरीय बैठकबाट कार्यदल गठन भएको थियो । यो सुचना सार्वजनिक भएपछि उजुरी दिनेक्रम बढ्न थालेको छ ।

आर्थिक अपराधिक क्रियाकलापमा परेका उजुरी माथी गृह मन्त्रालयले कसरी छानविन र कस्तो कारवाही हुने छ भन्ने बिषय भने खुलाइएको छैन । यस्ता अपराधमा संलग्न व्यक्तिहरुलाई कडा कारवाही र यो सुचनालाई वडा तहसम्म पु¥याउनुपर्ने स्थानीयहरुको भनाई छ ।