समानुपातिकतर्फ भाग लिने राजनीतिक दललाई निवेदन पेस गर्न आह्वान

८ भदाै, काठमाडाैं ।  निर्वाचन आयोगले समानुपातिक निर्वाचन प्रणालीतर्फ भाग लिन चाहने राजनीतिक दललाई निवेदन पेस गर्न आह्वान गरेको छ । आगामी मंसिर ४ गते हुने प्रतिनिधिसभा सदस्य र प्रदेशसभा सदस्य निर्वाचन, २०७९ मा समानुपातिकतर्फ भाग लिने चाहने दललाई आयोगले निवेदन पेस गर्न आह्वान गरेको हो ।

निर्वाचन आयोगको कानुन तथा राजनीतिक दल व्यवस्थापन महाशाखाका प्रमुख यज्ञप्रसाद भट्टराईले भदौ १० गतेदेखि १२ गतेभित्र राजनीतिक दललाई निवेदन दर्ता गर्न आह्वान गरेको बताए । आयोगले साउन २२ गतेदेखि ३१ गतेसम्म निर्वाचन प्रयोजनका लागि दल दर्ता आह्वान गर्दा ८७ दल दर्ता भएका थिए ।

दर्ता भएको दलमध्ये समानुपातिकतर्फ भाग लिन चाहने दलले मुख्य निर्वाचन अधिकृतको कार्यालयमा निवेदन दिनुपर्नेछ । समानुपातिक निर्वाचन प्रणालीतर्फको गतिविधि सञ्चालन गर्न मुख्य निर्वाचन अधिकृतको कार्यालय आयोगमै स्थापना भएको छ । प्रतिनिधि सभा र प्रदेश सभा सदस्यको समानुपातिकमा भाग लिन मुख्य निर्वाचन अधिकृतकै कार्यालयमा निवेदन दिनुपर्ने आयोगले जनाएको छ ।

प्रतिनिधि तथा प्रदेश सभा सदस्य निर्वाचनका लागि ८७ दल दर्ता भएका छन् । १२ वटा दलले तालमेल गरेर चुनावमा स्पर्धा गर्न चार वटा समूह बनाएका छन् । एकल चुनाव चिन्ह लिई संयुक्त रुपमा निर्वाचनमा सहभागी हुने गरी आयोगमा दर्ता भएका दलले सबै दलको केन्द्रीय समितिको संयुक्त वा अलग अलग रुपमा निवेदन दिन पाउनेछन् ।

निवेदनसँगै सम्बन्धित निर्वाचनमा समानुपातिक निर्वाचन प्रणालीतर्फ भाग लिन केन्द्रीय समितिले गरेको निर्णयको प्रतिलिपि बुझाउनुपर्नेछ । तर त्यस्तो निर्णयमा अधिकार प्राप्त अधिकारीले हस्ताक्षर गरी दिनुपर्नेछ ।

दलले प्रतिनिधि सभा सदस्य निर्वाचनका लागि छुट्टै र प्रदेश सभा सदस्यको समानुपातिकतर्फ प्रत्येक प्रदेशका लागि छुट्टै निवेदन दिनुपर्ने आयोगले जनाएको छ । आयोगको निर्वाचन कार्यतालिका बमोजिम समानुपातिक निर्वाचन प्रणालीतर्फ राजनीतिक दलहरुले उम्मेदवारको बन्द सूची असोज २ र ३ गते पेस गर्नुपर्नेछ ।