जब अल्फा बिटाका प्रतिनिधिले आफ्नै भवनको नक्सा बालेनसँग मागे

९ भदौ काठमाडौं । काठमाडौं महानगरपालिकाका प्रमुख बालेन्द्र साह र बुद्धनगरस्थित अल्फा बिटा कम्प्लेक्सका प्रतिनिधिबीच विवाद भएको छ । अवैध संरचना हटाउने क्रममा अल्फा बिटा कम्प्लेक्स पुगेका प्रमुख बालेन्द्र साह र कम्प्लेक्सका सञ्चालकबीच दोहोरो सवाल जवाफ भएको हो ।
अल्फा बिटा कम्प्लेक्स पुगेका प्रमुख बालेन्द्र साहले उक्त भवनको नक्सा खोजेका थिए । कम्प्लेक्सका प्रतिनिधिले महानगर प्रमुख साहलाई नक्सा देखाउन भने । साहले भने, “तपाईको घरको नक्सा मसँग हुन्छ ?”

अल्फा बिटाका प्रतिनिधिले प्रमुख बालेनसँग जङ्गिएर नबोल्न भन्दै खाली गराउने कागजात मागे । प्रतिनिधिले भने, “कानुनको पालना सबैले गर्नुपर्यो, महानगर पनि कानुनी प्रकृयाबाटै आउनुपर्यो ।” जवाबमा प्रमुख बालेनले हातमा राखेको सूचना देखाउँदै भने “यत्रो ३५ दिने सूचना निकालेको देख्नुभएन, महानगरभित्रका साढे दुई लाख घरधनीलाई एक एक गरेर सूचना दिन मिल्छ ?”

बालेनको उत्तर मिश्रित प्रश्नपछि अल्फा बिटाका प्रतिनिधिले कागजातसहित महानगरमा आउने बताए । उनले भने, “हामीले राज्यलाई कर तिरेका हौं, यसरी गर्न भएन ।” बालेनसहितको महानगरको टोलि अगाडि बढे ।