आजबाट देशैभर ‘जनताको साथमा कांग्रेस’ अभियान सुरु

१० भदौ, काठमाडौं ।  नेपाली कांग्रेसले आजदेखि देशैभर ‘जनताको साथमा कांग्रेस’ अभियान सुरु गरेको छ । आगामी प्रदेश र संघीय निर्वाचनलाई लक्षित गरी यो अभियान सुरुगरिएको हो । सत्ताको नेतृत्वसमेत गरिरहेको कांग्रेस सत्ता गठबन्धनमा रहेका दलहरुसँगै चुनावमा जाने तयारीमा छ ।

आगामी ४ मंसिरको प्रदेश तथा प्रतिनिधिसभा निर्वाचनलाई लक्षित गरी आजदेखि २४ गतेसम्म कांग्रेसले यो अभियान चलाउन लागेको हो । अभियानका लागि कांग्रेसले यसअघि नै अभिमुखीकरण गरेर केन्द्रीय प्रतिनिधि ७७ जिल्लामा पठाइसकेको छ ।

यो अवधिमा केन्द्रीय प्रतिनिधिले जिल्लामा गई जिल्ला कार्यसमिति, महाधिवेशन प्रतिनिधि, महासमिति प्रतिनिधिलगायतको बैठक बोलाउने छन् । अभियानमा प्रदेश समिति र जिल्ला समितिले समेत मातहतमा प्रतिनिधि खटाउनेछन् ।

अभियानमा जनताका समस्या सुन्ने, कांग्रेस नेतृत्वको सरकारले गरेको कामको जानकारी गराउने र सत्तारुढ गठबन्धनका दलहरुबीच तालमेलको औचित्य पुष्टि गरिने कांग्रेसले जनाएको छ । अहिले खटाइएका प्रतिनिधिहरु धमाधम कार्य क्षेत्र तर्फ लागेका छन् ।