आजदेखि आयोगमा समानुपातिकतर्फ उम्मेदवारी दर्ता हुँदै

१० भदौ, काठमाडौं । निर्वाचन आयोगले आजबाट समानुपातिक निर्वाचन प्रणालीतर्फ भाग लिन चाहने राजनीतिक दलको निवेदन लिदैछ । आयोग परिसरमा रहेको मुख्य निर्वाचन अधिकृतको कार्यालयमा राजनीतिक दलले निवेदन दर्ता गराउनेछन् ।

आयोगका प्रवक्ता शालिग्राम शर्मा पौडेलले प्रत्यक्षतर्फ दलका उम्मेदवारले मनोनयन दर्ता गरे झैं समानपातिकतर्फ राजनीतिक दल उम्मेदवार भई मनोनयन दर्ताका लागि निवेदन दिने बताए । आयोगले निवेदन दर्ताका लागि भदौ १२ गतेसम्मको समयसीमा तोकेको छ । आयोगका कार्यतालिका बमोजिम असोज २ र ३ गते दलले समानुपातिकतर्फका उम्मेदवारको बन्दसूची पेस गर्नेछन् ।

निर्वाचन आयोगमा निर्वाचन प्रयोजनका लागि ८७ दल दर्ता भएका छन् । दर्ता भएका ८७ दलमध्ये ७५ वटा दलले एकल र चार वटा समूहमा रहेका १२ दलले तालमेल गरे बमोजिम चुनाव चिह्न पाउनेछन् ।

आयोगले बुधबार मात्रै उक्त दलहरुको दर्ता स्वीकृत गरेको थियो । दर्ता स्वीकृत भएका ८७ दलले मात्रै समानुपातिकतर्फ उम्मेदवारी मनोनयन गर्न पाउने प्रवक्ता पौडेलले बताए । आयोगले प्रतिनिधि सभा र प्रदेश सभातर्फ स्पर्धा गर्ने दलले छुट्टाछुट्टै उम्मेदवारी मनोनयन गर्नुपर्ने जनाएको छ ।