सत्ता गठबन्धन कार्यदलमा प्रदेशसभा क्षेत्र बाँडफाँटबारे छलफल

१० भदौ, काठमाडौं ।
सत्ता गठबन्धनमा आबद्ध दलहरुबीच सिट बाँडफाँटको स्वरुप तयार गर्न बनेको कार्यदलको बैठकमा प्रदेशसभा निर्वाचन क्षेत्रबारे पनि छलफल सुरु भएको छ । यसअघिका कार्यदलका बैठकमा प्रतिनिधिसभा निर्वाचन क्षेत्रको बाँडफाँटबारे मात्रै छलफल हुने गरेकामा कार्यदलले शुक्रबारदेखि प्रदेशतर्फ पनि छलफल उन्मुख गराएको छ ।

शुक्रबार प्रधानमन्त्री निवास बालुवाटारमा बसेको कार्यदलको बैठकमा प्रदेशतर्फ पनि बाँडफाँट कसरी गर्ने भन्नेबारे छलफल सुरु भएको सञ्चारमन्त्री तथा कार्यदलका सदस्य ज्ञानेन्द्र बहादुर कार्कीले जानकारी दिए । तर, ठोस सहमति नबनेकोले यसबारे छलफलका लागि आइतबार पुनः बैठक बोलाइएको छ । ‘नेतृत्वले कार्यदललाई सुम्पेको जिम्मेवारी अनुसार संघको बारेमा छलफल हुँदा आएकोमा आज प्रदेशमा प्रवेश गरिएको छ ’, उनले भने ।

कार्यदलले प्रतिनिधि सभा क्षेत्रको बाँडफाँट सम्बन्धमा समेत सहमति गरिसकेको छैन् ।