बामदेवको पार्टीले चुनावबाट नाम फिर्ता लियो

११ भदौ , काठमाडौं । राष्ट्रिय सभा सदस्य समेत रहेका बामदेव गौतम संयोजकत्वको नेपाल कम्युनिष्ट पार्टी एकता राष्ट्रिय अभियानले आगामी चुनावमा भाग नलिने भएको छ । दल दर्ता गराएपनि केन्द्रीय समितिको निर्णयले चुनाव प्रयोजनका लागि गरिएको दर्ता हटाउन उक्त दलले बिहिबार निवेदन दिएको थियो ।

निर्वाचन आयोगको कानुन तथा राजनीतिक दल व्यवस्थापन महाशाखाका प्रमुख यज्ञप्रसाद भट्टराईले गौतम नेतृत्वको दलको केन्द्रीय समितिले बिहिबार दिएको निवेदनको आधारमा आयोगले उक्त दलको दर्ता हटाएको बताए । आयोग पदाधिकारीको निर्णयले सो दलको दर्ता हटउने निर्णयपछि निर्वाचन प्रयोजनका लागि दर्ता भएको दलको सूची परिमार्जन गरिएको छ ।

प्रतिनिधि सभा तथा प्रदेश सभा सदस्य निर्वाचनमा अब ७४ दलको ७८ चुनाव चिह्न मात्रै मतपत्रमा रहनेछन् । यसअघि ७५ दल एकलरुपमा दर्ता भएकोमा १२ दलले चार समूह बनाएर संयुक्त चुनाव चिह्नको माग गरेको थियो ।