प्रधानमन्त्री देउवासँग भारतको ‘नेशनल डिफेन्स कोर्ष’ भ्रमण दलको भेटवार्ता   

१३ भदौ, काठमाडौं । नेपाल भ्रमणमा रहेको मित्रराष्ट्र भारतको ‘नेशनल डिफेन्स कोर्ष’–६२ को भ्रमणदलले प्रधानमन्त्री एवं रक्षामन्त्री शेरबहादुर देउवा र अर्थमन्त्री जनार्दन शर्मासँग शिष्टचार भेटवार्ता गरेको छ ।

भदौ १२ गतेदेखि नेपाल भ्रमणमा रहेको उक्त भ्रमण दलका प्रमुख ‘एयर भाइस मार्शल’ तेजविर सिंहले आज शिष्टाचार भेटघाट गरेको  नेपाली सेनाको जनसम्पर्क तथा सूचना निर्देशनालयले जनाएको छ । उक्त शिष्टाचार भेटघाट पूर्व भ्रमण दलले जङ्गी अड्डाको भ्रमण गरेको थियो ।

भ्रमणको क्रममा भ्रमण दलका सदस्यहरू नेपाली सेनासँग सम्बन्धित विषयमा आधारित प्रस्तुतिकरण तथा अन्तरक्रियात्मक कार्यक्रममा सहभागी हुनुभएको निर्देशनालयले जनाएको छ । सोही क्रममा, उक्त भ्रमण दलका प्रमुखले प्रधान सेनापति प्रभुराम शर्मासँग जङ्गी अड्डामा शिष्टाचार भेटघाट गरेको थियो ।

भ्रमण दलले पोखरास्थित नेपाली सेनाको मध्य कमाण्ड हेडक्वाटर, काठमाडौँ दरबार स्क्वायर, लुम्बिनी, नाम्चे बजार तथा काठमाडौँ र पोखरामा अवस्थित विभिन्न पर्यटकीयस्थलको अवलोकन भ्रमण सम्पन्न गरी भदौ १६ गते स्वदेश फिर्ता हुने कार्यक्रम रहेको छ । विगतदेखि नै प्रचलनमा रहेको यस प्रकारको भ्रमणले दुई देशबीचको सैनिक सम्बन्धलाई थप सुदृढ पार्नुका साथै आपसी सम्बन्धलाई थप उचाइमा पु¥याउन मद्दत पुग्ने नेपाली सेनाको विश्वास छ ।