शीर्ष नेताबीच भद्र सहमतिः कांग्रेसलाई ८५, चार दललाई ८०

१५ भदौ, काठमाडौं । चुनावी तालमेल गर्ने सहमति गरेका सत्ता गठबन्धन दलका शीर्ष नेताबीच सीट बाँडफाँटमा भद्र सहमति भएको छ । सीट बाँडफाँटको छलफल थालेको झण्डै एक महिनापछि शीर्ष नेताबीच भद्र सहमति भएको बताइएको छ ।

नेपालबहससँग कुरागर्दै कार्यदलका एक शीर्ष नेताले गएराती नेताहरु भद्र सहमतिमा पुगेको बताए । उनका अनुसार नेपाली कांग्रेस लचिलो हुँदै १ सय सीटबाट ८५ मा झरेको छ । संघमा कांग्रेसले ८५ सीट लिएर बाँकी सीट अरु दललाई छाडेको उनले बताए ।

भद्र सहमति अनुसार बाँकी रहेको ८० सीट मध्ये नेकपा माओवादीले ४० सीट, नेकपा एकीकृत समाजवादीले २० सीट, जनता समाजवादी पार्टीले १८ र राष्ट्रिय जनमोर्चाले २ सीट लिने गरी सहमति भएको छ । तर, यो नै आधिकारिक निर्णय नभएको उनले बताए । बुधबार साँझ ५ बजे कार्यदलसहित गठबन्धनको बैठक बस्दैछ ।

साँझ बस्ने गठबन्धनको बैठकमा यही खाका प्रस्तुत गरिने भएको छ । आज दिनभरमा अरु कुनै राजनीतिक उतावचढाव नआएमा सम्भवत भद्र सहमतिमा भएको बाँडफाँड नै अन्तिम निर्णयका रुपमा आउने उनले बताए । भद्र सहमतिमा माओवादीले आफुलाई सीट संख्या कम भएको दावी गरिरहेकाले ८० सीटको बाँडफँडमा तलमाथि हुने सम्भावना रहेको ती नेताको भनाइ छ ।

उनले दलगत रुपमा तलमाथि भएपनि अन्तिम भागबण्डा भने ८० र ८५ मै रहने दावी गरेका छन् । सीट बाँडफाँडमा शीर्ष नेताहरुबीच भएको भद्र सहमतिबारे नेपाली कांग्रेसमा आन्तरिक छलफल भने भएको छैन । महामन्त्री गगन थापाबाहेक केही नेतालाई मात्रै यस विषयमा जानकारी भएको उनले बताए । सीट संख्यामा ४० प्रतिशत हिस्सा खोजिरहेको डा. शेखर कोइराला समूहलाई यसबारे बुधबार बिहान जानकारी गराईने उनको भनाइ छ ।

मंगलबार साँझसम्म पनि गठबन्धनमा रहेका दल सकेसम्म बढी हिस्सा लिन एक–अर्कामा बार्गेनिङमा उत्रिएका थिए । गठबन्धनको सबैभन्दा ठूलो दल भएपनि नेपाली कांग्रेसका सभापति एवं प्रधानमन्त्री शेरबहादुर देउवाले लचकता देखाएर यो भद्र सहमति भएको ती नेताको भनाइ छ ।

सिटौला बिरामी परेपछि प्रधानमन्त्री देउवाले दलहरूबीच सहमतिको वातावरण बनाउन अर्का नेता रामचन्द्र पौडेललाई खटाएका थिए । नेता पौडेलले मंगलबार दिनभर गठबन्धन दलका नेताहरूलाई घर–घरै पुगेर सीट बाँडफाँटका विषयमा सहमति जुटाउने प्रयास गरेका थिए ।

मंगलबार पौडेलले एकीकृत समाजवादीका अध्यक्ष माधवकुमार नेपाललाई निवासमै पुगेर भेटेका थिए । पौडेलले त्यही विषयमा जनता समाजवादी पार्टीका अध्यक्ष उपेन्द्र यादवलाई समेत भेटेका थिए । नेपाल र यादवसँग छुट्टाछुट्टै भेटवार्ता गरेका नेता पौडेलले माओवादी अध्यक्ष पुष्पकमल दाहाल‘प्रचण्डसँग पनि फोन कुरकानी गरेका थिए ।